Ukraina Yuqarı Radasınıñ reisi Dmıtro Razumkov «Qırım platforması» çerçivesinde halqara qurulışlarğa ve çetel memleketlerine işbirligini quvetleştirüv meselesinde muracaat qabul etilecek parlamentniñ nevbetten tış sessiyası avgustnıñ 23-nde çağırılacağına dair buyruq imzaladı, dep bildirdi spikerniñ matbuat kâtibi Olğa Tuniy.
Onıñ aytqanına köre, nevbetten tış sessiyası saat 16:00-da başlanacaq, onı 156 halq deputatınıñ talabınen çağıralar.
«Ukraina Yuqarı Radasınıñ BM, PACE, OSCE Parlament assambleyası, NATO Parlament assambleyası, Qara deñiz iqtisadiy işbirligi teşkilâtınıñ Parlament assambleyası, Avropa parlamenti, çetel devletlerniñ ükümetleri ve parlamentlerine Rusiye Federatsiyasınıñ tecavuzına tirenüv içün Qırım platforması çerçivesinde halqara işbirligini quvetleştirüv muracaatınıñ qarar leyhası (№ 5775) baqılacaq», – dep yazdı Tuniy avgustnıñ 18-nde Facebookta.
Avgustnıñ 23-nde Kyivde «Qırım platformasınıñ» sammiti keçirilecek. Tış işler naziri Dmıtro Kuleba 40-tan çoq memleket sammitte iştirak etecegini tasdıqladı, dep bildirdi.
Ukraina ve ortaqlarınıñ fikirince, «Qırım platforması» Qırım yarımadasınıñ işğalden qurtarıluvını azırlamaq içün bir meydançıq ola.
«Qırım platforması»
Qırımnı işğalden qurtaruv halqara meydançığı (Qırım platforması) – Ukraina akimiyetiniñ qırımlılarnıñ aqlarını qorçalamaq ve işğal altındaki yarımadanı azat etmek içün Ukraina ve halqara ortaqlarınıñ areketlerini koordinatsiya etmek içün muzakere platformasınen bağlı teşebbüsidir.
2020 senesi sentâbr ayında Ukraina prezidenti Volodımır Zelenskıy BM Baş Assambleyasınıñ 75-nci sessiyasında iştirakçi memleketlerni bu platforma qurulmasına qoşulmağa çağırdı.
Daa evel böyle planlarını Ukrainanıñ vaqtınca işğal etilgen topraqlar meseleleri nazirligi ve Ukraina Tış işler nazirligi aydınlatqanlar. Ukraina Tış işler nazirligi, Donbastaki zıddiyetni çezüv ve Qırımnı işğalden qurtaruv muzakere meydançıqları bir-birinden ayrı olmalı, dep tüşüne.
Ukraina Tış işler naziriniñ birinci muavini Emine Ceppar bildirgenine köre, Rusiyeni Qırımnı işğalden qurtaruv halqara platformasında iştirak etmege davet etecekler, amma iştirak etecegine inanmaylar. Bundan evel Ukraina Tış işler naziri Dmıtro Kuleba, Rusiyeni bu meydançıqta körmey, dep ayttı.
2020 senesi oktâbr ayında Poloniya Qırımnı işğalden qurtaruv halqara platforması çerçivesinde çalışmağa meraqlı, dep bildirdi.
Ukraina prezidenti Volodımır Zelenskıy bildirgenine köre, Avropa Birliginiñ liderleri Avropa Birliginiñ Qırımnı işğalden qurtaruv platformasına qoşulmağa azır olğanını ayttı. Resmiy Kyiv Qırımnı işğalden qurtaruv platformasına Türkiye, Malayziya, Slovakiya, Büyük Britaniya ve diger memleketler qoşulır, dep bekley.
Kreml, Qırım meselesi qapatıldı ve Rusiye onı halqara muzakerelerge almaycaq, dep bir qaç kere bildirgen edi.
