İyünniñ 16-nda gece Qırımda patlavlar, atış ve dronlar eşitildi, dep haber ete Qırım telegram kanalları.
"Krımskiy veter" kanalı haber etkenine köre, saat 23:00-dan 23:30-ğa qadar Aqmescit rayonında ayrı dronlarnıñ uçqanı eşitildi.
Saat 23:20-den 23:33-ke qadar Ermeni Bazar rayonında atış da eşitildi, onı Rusiye mobil ateş gruppaları açtı, dep tahmin etile. Saat 02:06-dan saat 02:12-ge qadar İslâm Terekte toplardan atış eşitildi. Yerli sakinlerniñ tahminlerine köre, ateş dronlarğa açıldı.
Bundan ğayrı, Canköy demiryol vokzalı ve Aqmescit civarındaki Sarabuz tarafında patlavlar aqqında bildirildi. Soñra Sarabuzdan şimalde qalğan Proletnaya demiryol stantsiyasına qarşı tahminiy darbe aqqında haber etildi. NASA Firms hızmetiniñ uydu çekimleri anda yanğınnı qayd etti. Bu malümatnı tasdıqlağan başqa bir mustaqil malümat yoq.
Saba Rusiye Mudafaa nazirligi Rusiyeniñ 14 regionında, işğal etilgen Qırımda ve Qara ve Azaq deñizlerinde 172 ukrayin uçucısızınıñ yoq etilüvi aqqında bildirdi. Müessise bunıñ delilini köstermedi. Tüşürilemegen dronlarnıñ sayısı aydınlatılmadı.
2022 senesinden başlap Qırım yarımadasınıñ territoriyasına aman-aman er kün pilotsız uçaq ve raketalar ücüm ete. Çoqusı allarda Rusiye Mudafaa nazirligi ya da Rusiye akimiyeti, bu malümatnı tasdıqlasa bile, arbiy obyektlerge zarar ketirilgenini tasdıqlamay.