Rusiyeniñ işğal etilgen yerlerde, hususan Qırımda yapqan şaraitleri Ukrayına vatandaşlarını Rusiye pasportlarını almağa mecbur ete. Bu aqta KrımSOS talilcsi Yevğen Yaroşenko UNIAN neşirine izaat berip ayttı.
«Birinciden, işğal etilgen topraqlarda işğalci akimiyetniñ qararları em Ukrayına qanunlarına, em halqara uquqqa köre qanunsız ola. Ekinciden, Rusiye işğal etilgen topraqlarda öyle bir şaraitler yapqan ki, Rusiye pasportını aluv yaşav anahtarı oldı, yani istegeniñ içün almaysıñ, almağa mecbursıñ», – dep tüşüne talilci.
Lâkin şunı hatırlamaq kerek ki, Rusiye pasportını almağa mecbur olğan ukrayınalılar işğalci orduğa alına ve «saylavlarda» iştirak etmege zorlana bile.
KrımSOS uquqçısı Anastasiya Kalininka qayd etkenine köre, 2014 senesinden başlap Rusiye pasportlarnı manipulâtsiya mehanizmi olaraq qullana. «Bütün içtimaiy tölevler, pensiya, diger hızmetler Rusiye vesiqalarını talap ete. Bazı vaqıtları onı almaq insanlar içün işğalden yaşamaqnıñ yekâne imkânı ola», – dep ayta uquqçı.
Belli olğanına köre, Rusiye İç işler nazirligi Ukrayına vatandaşlığını gizli qaldıra bilgen Rusiye vatandaşlarını közetüv fermanınıñ leyhasını azırladı. Buyruq ilk evelâ Ukrayınanıñ işğal altındaki topraqlarınıñ, hususan Qırımnıñ sakinlerine çalışacaq, çünki bir qısmı Rusiye pasportını alıp, Ukrayına vatandaşlığından çıqqanını bildire.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
