Rusiye akimiyeti işğal etilgen Qırım parklarında tereklerni kesip, odunnı Herson ve Zaporijjâ vilâyetlerindeki Rusiye Federatsiyası ordusına yollay. Bu aqta «IPC-Pivden» neşiriniñ mühbirleri haber etti.
Bu aktsiyağa «Sığınaqlar sıcaq» adı berildi. Tek arbiyler degil, yerli gençler de celp etile. Hususan fevralniñ başında Aqmescitteki Bala parkından eki yük maşinası odun çıqarıldı.
Neşir qayd etkenine köre, yarımadada bu aktsiya daa 2023 senesi başlandı. Noyabr ayında olğan qasırğadan soñ Aqmescitniñ «yeşil alanları» kesilip başlandı. Amma bu qışta Rusiye akimiyeti parklarnı yaramay ava aqibetlerini yoq etüv aqqında aytmayıp kesip başladı.
Bu odun Rusiye Federatsiyası tarafından işğal etilgen Hersonnıñ sol yalısındaki Rusiye zeminliklerini ve sığınaqlarını qızdırmaq içün qullanılacaq. Olar da Zaporijjâ yönelişine yollanacaq.
Ukrayinağa qarşı büyük ücüm vaqtında Rusiye küçleri işğal etilgen Qırımnı arbiy poligon ve cebe bazası olaraq qullana. Yarımadada raketalar atuv kompleksleri yerleştirildi, arbiy uçaq alanlarında uçaq ve vertolötlar bar, yaqın vaqıtqa qadar limanlarda Qara deñiz flotunıñ gemileri de bar edi. Ukrayina ekologlarınıñ aytqanına köre, 2022 senesi fevral ayından başlap yarımadanıñ tabiat vaziyeti sezilecek derecede fenalaştı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
