Qırımnıñ Qarasuvbazar rayonındaki Zuya qasabasında iyülniñ 2-nde 19 yaşında Osman Aciosmanov ğayıp oldı, Rusiye polisi ve qıdıruv-qurtaruv otrâdları qıdıruvlarnı eki kere teşkil etti, lâkin bir neticesi olmadı.
Bu aqta ğayıp olğan gençniñ qartanası Aliye Umerova Qırım.Aqiqatqa haber etti.
«Polis qıdıra, «LizaAlert» qıdıra. Bir neticesi yoq. Polisnen beraber eki kere ormanğa barıp, santim-santim baqqanlar. Birinci kere 13 kişi bardı, soylarımız barıp qıdırdı. Ekinci kere çoq insan keldi. Cumaertesi künü, 24-nde, qıdıruv gruppası keldi, amma kimse bir yerde bir şey körmedi», – dep bildirdi Umerova.
Qadınnıñ aytqanına köre, Osmannıñ öz isteginen evden ketmesi içün bir sebep yoq edi.
«Qavğa etmedik, ğayıp olması içün bir sebep yoq edi. Men din kütken insanım, cuma 2-nde namaz qılmağa kettim (ğayıp olğan vaqtı – QA), bayramğa azırlana edik», – dep tarif etti Umerova.
Hatırlatamız, Qırımdaki Rusiye İç işler nazirliginiñ idaresi evden ketip qaytmağan yaltalı genç Sergey Sinjenkovnı qıdırıp başladı.
Baarde Yaltada evden ketip qaytmağan 15 yaşında genç aqqında haber etilgen edi.
