Qırımnıñ Baş Müftisi Ayder Rustemov ve «Umma» Ukrayına musulmanları diniy idaresiniñ müftisi Murat Suleymanov İsviçrede keçirilecek Barışıq sammiti arfesinde musulman memleketleriniñ ükümetlerini Ukrayınanıñ «er kesni qaplağan, adaletli ve dayanıqlı bir barışıq» tiklenmesi içün ğayretlerine qoltutmalarına çağırdılar.
Qırımnıñ Baş müftisi Ukrayına musulmanları, qırımtatarlar 2014 senesinden berli «Rusiye yabaniy usullarnen kerçekleştirgen cenkniñ qurbanları ola», dep qayd etti.
«Bizni, Qırımnıñ avtohton halqını tuvğan toprağından, tuvğan evlerinden quvğanlar. İşğalde qalğanlarnı bu 10 yıl devamında zorbalıq, işkencelerge oğratalar, apiske atalar, hırsızlay ve öldüreler, balalarını ise bala bağçalarında ve mekteplerde Rusiye gimnini yırlamağa ve Rusiye arbiy urbasında yürmege zorlaylar, soñra ise Rusiye ordusına nişan olmaları içün seferber eteler. Yüz biñlernen musulman Qırımda barışıqta degil, cenkte yaşay», – dedi Rustemov öz muracaatında.
«Umma» Ukrayına musulmanları diniy idaresiniñ müftisi Murat Suleymanov qayd etkenine köre, Ukrayınanıñ musulman toplulığı «bu cenkniñ eñ büyük qurbanlarından biri oldı», çünki Qırım işğalinden soñ Rusiye Donetsk ve Lugansk vilâyetlerine kirdi, anda ise büyük musulman cemiyetleri yaşay – qazan tatarları.
«Bu balaban cenkniñ yıllarında bir qaç Ukrayına camisi Rusiye bomba ve raketalarından zarar kördi, bazıları bütünley yoq etildi. Lâkin biz – Ukrayına musulmanları – mında qalıp, ayette aytılğanı kibi, zayıf erkek, qadın ve balalar içün küreşmege devam etemiz. Ve ukrayınalılarğa qoltutmağa çağıramız», – dep qayd etti öz muracaatında Suleymanov.
Onıñ aytqanına köre, er kesni qaplaycaq, adaletli ve turğun bir barışıqnıñ tiklenüv yolu – Ukrayınanıñ Barışıq formulasını yerine ketirmek ve eñ yüksek seviyede Barışıq sammitinde iştirak etip, bu yolğa açıq-açıq qoltutmaqtır.
Ukrayına akimiyeti Büyük barışıq sammiti dep adlandırğan konferentsiya iyünniñ 15-16-nda keçirilecek. 100-ge yaqın memleket Lütsern şeeri yaqınlarında Bürgenştok kurortında körüşüvde iştirak eter, dep beklenile. Ukrayına prezidenti ofisiniñ soñki malümatına köre, 107 memleket ve halqara teşkilât Barışıq sammitinde iştirak etecegini bildirdi.
Sammitke davet etilmegen Rusiye İsviçrede iyünge planlaştırılğan Ukrayınadaki barışıq muzakereleri Rusiye iştirak etmese, faydasız olacaq, dep bildirdi. Rusiye Federatsiyası Tış işler nazirliginiñ vekili Mariya Zaharova «Rusiyeniñ isteklerine qulaq asmağan» Ukrayınağa nisbeten er angi bir areket «aqiqattan uzaqtır», dep ayttı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
