Qırım mekteplerinde 788 sınıf uzaqtan oqutuvğa keçirildi, keskin respirator virusl infektsiyalarsnıñ çoqluğı sebebinden ise 48 mektep bütünley bu oquv formatına keçirildi. Bu aqta Qırım ve Aqyar Rospotrebnadzor idaresi bildirdi.
Berilgen malümatqa köre, 225 bala bağçasınıñ gruppası qapatıldı. Aqyarda 302 sınıf uzaqtan oqutuvğa keçirildi ve bala bağçalarınıñ 23 gruppası qapatıldı.
Rusiye müessisesiniñ malümatına köre, umumen Qırımda 18 biñden çoq hasta qayd etildi, Aqyarda – yedi biñ. Rospotrebnadzor malümatınıñ doğru olıp olmağanını teşkermek şimdilik zor.
Keçken afta haber etilgenine köre, Qırımda KRVİ ve gripp sebebinden 10 mektep qapatılğan edi. Bu malümatnı Rusiye kütleviy haber vastaları Qırım ve Aqyar Rospotrebnadzor Regionlarara idaresiniñ epidkozetüv bölügine esaslanıp berdi.
Rusiye baş mütehassısı-epidkozetüv bölüginiñ eksperti Viktoriya Gudzniñ aytqanına köre, Qırımnıñ 97 oquv yurtunda 358 sınıf uzaqtan oqutuvğa avuştırıldı, Qırımnıñ bala bağçalarında 60 gruppa qapatıldı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
