Qırımda bir künde COVID-19 hastalarınıñ sayısında kene rekord qayd etile. Oktâbrniñ 27-si sabasına 670 yañı hasta qayd etildi, tünevinden daa çoq, dep bildire Qırımnıñ Rusiye sağlıq nazirliginiñ matbuat hızmeti.
Müessise malümatına köre, bir künde Qırımda 16 insan koronavirustan vefat etti, pandemiya vaqtında 2927 kişi vefat etti.
«Umumen pandemiya vaqtında 93 984 COVID-19 hastası qayd etildi. Bir künde 963 insan yahşı oldı, bütün müddet devamında 79 738 kişi tüzeldi», – dep aytıla müessise haberinde.
Bir kün evelsi Qırımda qayd etilgen 662 COVID-19 hastası aqqında haber etilgen edi.
Qırımda oktâbrniñ 25-nden itibaren koronavirus pandemiyası vaziyetiniñ daa beter olması sebebinden yañı sıñırlavlar çalışıp başladı. Bazarertesi künü QR-kod sisteması çalışacaq.
Oktâbrniñ 20-nde yarımadada koronavirus ile küreş tedbirleri quvetleştirildi. Qırımnıñ Rusiye yolbaşçısı Sergey Aksenov oktâbrniñ 30-ndan noyabrniñ 7-ne qadar raatlıq künlerini ilân etti. Bundan evel Qırımda koronavirus pandemiyası sebebinden ilân etilgen yüksek seviyeli azırlıq rejimi dekabr ayına qadar uzatıldı. Oktâbrniñ 11-nde Qırımda yañı koronavirus sıñırlavları kirsetildi.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
COVID-19 koronavirus yuqunçı
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
