Qırım kirişinde yük maşinalarınıñ 10 kilometrlik tıqanıqlığı peyda oldı, dep bildirdi Telegramda Qırımnıñ Rusiye yük maşinaları ve ekspeditorlar birliginiñ reisi Anatoliy Tsurkin.
«Ticaret ağları, riteyl bayramlarğa, ortodoks pashağa ve mayıs bayramlarına azırlanıp başlay. Yükler artacağı tahmin etilgen bir şey ve bayramlar arfesinde mal ketirilüvinen bağlı», – dep ayttı Tsurkin.
O, tıqanıqlıq ne taraftan olğanını aytmadı.
Soñki vaqıtları Keriç köprü ögünde sıq-sıq tıqanıqlıqlar ola. Uzunlığı bir qaç kilometr teşkil ete. Sebebi köpürniñ bütün yolaqları açılğan soñ naqliyatnı baquv vaqtı artqanınen bağlıdır.
Oktâbrniñ 8-nde saba Qırım köpründe patlav oldı. Rusiye tahqiqatçılarınıñ versiyasına köre, yük maşinası patladı. Neticede eki maşina yolu zarar kördi, patlav sebebinden ya da aynı vaqıtta köpürniñ tren yolundan ketken yük treni yanıp başladı.
Rusiye prezidenti Vladimir Putin bu patlavnı «terakt» dep adlandırdı, onıñ icracıları ve sımarış etkenler Ukrayina mahsus hızmetleri ola. Rusiye Tahqiqat komiteti Rusiye Ceza kodeksiniñ 205-inci maddesine («Terrorizm») istinaden cinaiy dava açtı.
Ukrayına Baş istihbarat idaresiniñ spikeri Andrey Yusov Rusiyeniñ Keriç köpründe patlav tahqiqatını «saçmalıq» dep adlandırdı.
Ukrayına resmiy şahısları izaat bermey. Prezident ofisiniñ yolbaşçısı Mıhaylo Podolâk «Putinniñ şahsiy leyhasını» patlatuv – rusiyelilerniñ işi ve arbiy reberlikniñ FSBge qarşı ücümi ola, dep ayttı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
