Qırımda Rusiye uquq qoruyıcıları Keriç köprüni yoq etmege çağırğan insannı tuttılar. Bu aqta Rusiyeniñ «Vesti» neşiri haber ete.
Bu adam, berilgen malümatqa köre, Rusiyege qarşı paylaşuvlar yapılğan ve Rusiye Silâlı quvetlerini itibardan tüşürgen malümat derc etilgen bazı ukrayin çatlarında iştirak etti.
Böyle çatlardan birinde tutulğan kişi Rusiyeni işğal etilgen yarımadanen birleştirgen köpürni yoq etmege çağırğan izaatlar qaldırğan eken.
Berilgen malümatqa köre, adam 7 yılğa qadar apiske alına bile.
Adı ve soyadını, onıñ izaatlarını Rusiye kütleviy haber vastaları bildirmey.
Bundan evel Ukrayina prezidentiniñ Qırım Muhtar Cumhuriyetindeki temsilciligi Roskomnadzor Rusiye işğal etken Ukrayina topraqlarında, hususan Qırımda informatsion ceetten kontrolni quvetleştire, dep bildirdi.
Haberge köre, Rusiye müessisesiniñ qararına köre, internet provayderleri internetke bağlanğan bütün cihazlarnıñ IP adresleri, geolokatsion malümat, ağğa irişüv içün qullanılğan bütün cihazlarnıñ identifikatorları, qullanılğan programma teminatı ve internet trafiki aqqında malümatnı toplap Roskomnadzorğa bermeli.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
