Ukraina prezidentiniñ Qırım Muhtar Cumhuriyetindeki temsilciligi Ukraina vatandaşlarını Rusiye akimiyetiniñ Qırımda Qırım işğaliniñ 8 yılı munasebetinen keçirecek tedbirlerinde ola bilecek provokatsiyalar sebebinden iştirak etmemesine çağıra. Bu aqta Ukraina müessisesiniñ Facebook haberinde aytıla.
«Temsilcilikniñ malümatına köre, Rusiyeniñ işğalci memuriyetleri vaqtınca işğal etilgen Qırımda ve yerli akimiyet Moskvada martnıñ 18-nde «Qırımnıñ Rusiye Federatsiyası ile birleşüv kününe (Rusiye akimiyeti işğalni böyle adlandıra – QA) bağışlanğan kontsert-mitinglerni» teşkil etmek ve keçirmek maqsadınen memuriy resursnı qullana», – dep aytıla haberde.
Temsilcilikniñ malümatına köre, oquv yurtlarınıñ reberlerine «talebe ya da studentlerniñ propaganda tedbirlerinde iştirak etmesini temin etmege vazife berile, em de celp etilecek insanlarnıñ sayısı qayd etile».
«Mitinglerni teşkil etüv ve keçirüv meselelerinden mesüliyetli şahıslar «terror telükesiniñ» yüksek seviyesi ya da «ekstremist aktsiyaları» aqqında tenbiley ve quvetleştirilgen kontrol tedbirleri aqqında bildire», – dep aytıla haberde.
Ukraina prezidentiniñ temsilciligi, Rusiye akimiyeti «insanlar toplaşqan yerlerde bulunacaq vaqtınca işğal etilgen Qırımnıñ ya da Moskva şeeri sakinlerininiñ ayatını ve sağlığını telükege oğrata bile», dep tenbiley.
Rusiye akimiyeti Ukraina prezidenti temsilciliginiñ haberini açıq şekilde izaatlamadı. Ukraina akimiyetiniñ malümatı mustaqil şekilde tasdıqlanmadı.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
