Fevralniñ 26-nda «Sarı şerit» areketiniñ faalleri Qırım işğaline tirenüv kününi qayd etmek içün Yalta, Aqyar, Aqmescit ve Canköy şeerlerinde ukrayin tarafdarı aktsiyalar keçirip, fotoresimlerini Telegram kanalında derc etti.
«11 yıl evelsi şu künü Qırımnıñ Yuqarı Şurası ögünde separatizmge qarşı çıqqan ve yarımadanıñ Ukrayinanıñ bir qısmı qalmaq aqqını qoruğan biñlernen insan toplaştı. Amma bundan soñ işğal oldı. Repressiyalar. Taqipler. Amma ukrayinler boysunmadı ve razı olmadı. Tirenüv 11 yıldan berli devam ete ve yıl-yıldan quvetleşe», – dep yazdı faaller.
«Sarı şerit» teşkilâtı – Rusiyeniñ vaqtınca işğal etken Ukrayina topraqlarında ukrayinlerniñ qarşılıq areketidir. Areketniñ teşkilâtçılarınıñ aytqanına köre, yerastı faallerniñ sayısı bir qaç biñden ziyade ve ep arta. Olarnıñ aytqanına köre, Qırımdaki cemiyeti eñ faaldir, hususan Aqmescit, Yalta, Kezlev ve Kefede, soñki vaqıtları ise olarğa Simeiz, Balıqlava kibi kiçik şeerlerniñ sakinleri qoşula.
Qırım işğaline tirenüv künü – fevralniñ 26-nda qayd etilgen hatıra künüdir. 2014 senesi bu künü Aqmescitte Qırımtatar Milliy Meclisi tarafından teşkil etilgen Ukrayina topraq bütünligine qoltutuv mitingi olıp keçti. Aktsiya Rusiye işğaline qarşılıq kösterüviniñ esas tedbirlerinden biri oldı.
2020 senesi Ukrayina prezidenti öz buyruğınen fevralniñ 26-nı Qırım Muhtar Cumhuriyeti ve Aqyar şeeriniñ işğaline tirenüv kösterüv resmiy künü olaraq tasdıqlap, yarımadanıñ Ukrayina suverenitetine qaytarılması içün küreşniñ müimligini qayd etti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
