Ukrayinanıñ bir sıra şeerinde fevralniñ 26-nda Qırım işğaline tirenüv künü munasebetinen qırımtatar bayrağı tantanalı sürette köterildi, Qırımtatar resurs merkezi bu künge bağışlanğan informatsion yazuvlı şiarlarını azırladı.
«Suspilne Krım» yazğanına köre, qırımtatar bayrağı Vinnıtsâ, Lvivde ve Zakarpattâ vilâyetiniñ arbiy memuriyeti binasında köterildi.
Berilgen malümatqa köre, Vinnıtsâda vilâyetniñ arbiy memuriyeti ögünde bayraq köterildi. «Vetan» cemaat teşkilâtınıñ reberi Eskender Anafiyev tarif etkenine köre, Vinnıtsâ vilâyetinde Qırım ilşğalinden soñ eki biñden çoq qırımtatarı yerleşti.
Lvivde Rınok meydanında bayraq köterildi. «Suspilne Krım» yazğanına köre, toplaşqanlar qırımtatar gimnini icra etti.
Böyle bir aktsiya aqqında Zakarpattâ vilâyetiniñ yolbaşçısı Mıroslav Beletskıy da Facebook saifesinde bildirdi.
«On bir yıl evelsi bu künde Aqmescitte mitingge çıqıp, «Qırım – Ukrayinadır» degen biñlernen insanğa ürmet ve minnetdarlığımıznıñ bir timsalidir. Olar adaletsizlik, Rusiyeniñ zaptçı niyetleri ve devletimizni yoq etmek ıntıluvlarına qarşı çıqtı», – dep aytıla haberde.
Qırımtatar resurs merkeziniñ malümatına köre, Kropivnıtskıyde Qırım işğaline tirenüv kününe bağışlanğan levhalar peyda oldı. Bu yazuvlı şiarlar Qırımtatar resurs merkezi ve #LIBERATECRIMEA Qırımnı işğalden azat etüv ve qırımtatar halqınen birdemlik halqara areketi tarafından azırlandı.
«Bu levhalar ukrayin ve qırımtatarlarnıñ yarımadanıñ azatlığı oğrunda küreşi aqqında hatırlata», – dep yaza Qırımtatar resurs merkezi.
Qırım işğaline tirenüv künü – fevralniñ 26-nda qayd etilgen hatıra künüdir. 2014 senesi bu künü Aqmescitte Qırımtatar Milliy Meclisi tarafından teşkil etilgen Ukrayina topraq bütünligine qoltutuv mitingi olıp keçti. Aktsiya Rusiye işğaline qarşılıq kösterüviniñ esas tedbirlerinden biri oldı.
2020 senesi Ukrayina prezidenti öz buyruğınen fevralniñ 26-nı Qırım Muhtar Cumhuriyeti ve Aqyar şeeriniñ işğaline tirenüv kösterüv resmiy künü olaraq tasdıqlap, yarımadanıñ Ukrayina suverenitetine qaytarılması içün küreşniñ müimligini qayd etti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
