Qırım Muhtar Cumhuriyeti ve Aqyar şeeriniñ işğalge tirenüv kününde fevralniñ 26-nda «26-2-14: Cenk Qırımda başlandı» forumı keçirilecek. Tedbirde Rusiye işğal etken Qırımda yaşağan Ukrayına vatandaşlarınıñ küreş ve tirenüvi muzakere etilecek. Bu aqta fevralniñ 23-nde Ukrayına prezidentiniñ Qırım ve Aqyar temsilciliginiñ matbuat hızmeti bildirdi.
«Tedbirniñ maqsadı – Rusiyeniñ Ukrayınağa qarşı istilâsı 2014 senesi Qırım işğalinden başlanğanını ve tek Qırımnıñ azat etilüvi ve reintegratsiyasınen cenk bitecegini hatırlatıp qayd etmektir. Forum vaqtında işğal etilgen Qırımda yaşağan ve esas Ukrayınanen bir olğan ve Ukrayına Silâlı quvetlerini beklegen Ukrayına vatandaşlarınıñ küreşi ve tirenüvi muzakere etilecek; Ukrayına da Qırımnı kontrol altına almaq içün bir sıra reintegratsion strategiya ve qanun temellerini azırlağanı laf etilecek», – dep aytıla haberde.
Forumda çıqışta bulunacaq spikerler:
- Piter Dikinson, Atlantic Councilde UkraineAlert blogunıñ muarriri, izdatel jurnala Business Ukraine mecmuasınıñ naşiri
- Ceyms Braun, siyasetşınas professorı ve «Halqara münasebetler» bölüginiñ koordinatorı, Templ Universiteti, Yaponiya (online)
- Rori Finnin, Cambridge universitetinde Ukrayın studiyalarınıñ yolbaşçısı, Qırım tarihında mütehassıs
- Dmıtro Teperık, telükesizlik ve istiqrar, Qırımnıñ kögnitiv işğalden qurtarıluvı meseleleri eksperti, «Küçlü Ukrayına içün ortaqlıq» fondu (PFRU)
- Alina Frolova, Mudafaa strategiyaları Merkeziniñ İdare Reisiniñ Muavini
- Alena Luneva, «ZMINA» İnsan aqları merkeziniñ advokatsion müdiri
- Aleksandr Galenko, Kyiv iqtisadiyat mektebiniñ reisi, tarihçı, şarqşınaslardan biri
- Martin-Aleksandr Kislıy, tarihçı, «Kyiv-Moğıla akademiyası» Milliy universitetiniñ ocası, «Qırımtatarlar içün teşebbüs» leyhasınıñ iştirakçisi
- Mavile Halil, jurnalist, psiholog.
Forum Ukrayına prezidentiniñ Qırım Muhtar Cumhuriyetindeki temsilciligi, «Qırım platforması», «DOM» telekanalınıñ saifelerinde ve media ortaqlarınıñ informatsion resurslarında yayınlanacaq.
Ukrayına ükümeti fevralniñ 26-nda qayd etilgen Qırım işğaline tirenüv kününe bağışlanğan tedbir planını tasdıqladı.
Planğa köre, tasil müessiseleri, kütüphane, sergi salonları ve müzeylerde tedbirler keçirilecek. Qırımtatar halqınıñ temsilcileri ve Qırımdan köçip kelgenlernen körüşüvler yapılacaq, bediiy ve vesiqalı filmler kösterilecek ve ilmiy-ameliy konferentsiyalar keçirilecek, ekspertler yarımada işğaliniñ aqibetlerini yeñüv yollarını qıdıracaqlar.
Fevralniñ 26-nda Qırımnıñ Rusiye işğaline tirenüv künü qayd etile. Ukrayına ve dünyada aktsiya, munaqaşa, forum, miting, qırımlılarğa ve memleketniñ topraq bütünligine qoltutuv yürüşleri keçirile.
2014 senesi fevralniñ 26-nda Qırım Muhtar Cumhuriyetiniñ Yuqarı Rada binası ögünde Ukrayına topraq bütünligine qoltutuv mitingi keçirildi. Miting iştirakçilerine qarşı Rusiye tarafdarları, hususan «Rus birligi» firqası çıqtı.
2020 senesi yanvar ayında Ukrayına Yuqarı Radasınıñ deputatları, şu cümleden Ahtem Çiygoz ve Rustem Umerov Ukrayına prezidenti Volodımır Zelenskıyge muracaat etip, devlet seviyesinde Qırımnıñ Rusiye işğaline qarşı tirenüv kününi resmiy şekilde tasdıqlamağa rica etken edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
