Rusiye işğal etken Zaporijjâ vilâyetiniñ sakinleri ilân etilgen «tahliye» çerçivesinde işğal etilgen Qırımğa çıqarıla, dep bildirdi Ukrayına prezidentiniñ Qırım Muhtar Cumhuriyetindeki daimiy vekiliniñ muavini Denis Çistikov Svoboda Live (Azatlıq Radiosınıñ leyhası).
«Ukrayına Silâlı quvetleri tarqatqan malümatqa köre, onı vaqtınca işğal altındaki Qırımğa alıp keteler. Bundan ğayrı, vaqtınca işğal etilgen Qırımnıñ maşina naqliyatı ve maşina müessiseleri bu tahliye içün qullanıla. Bu malümat kütleviy haber vastalarında tarqatıldı», – dep ayttı Çistikov.
O, «yañı işğal etilgen» topraqlardan ketkenler içün berilgen para şimdi Qırımda berilmey, dep qoştı. «Bu Rusiye Federatsiyasına alıp ketmek içün bir keçiş noqtası oldı», – dep qayd etti Çistikov.
Temsilci muavininiñ aytqanına köre, bu topraqlarnıñ sakinlerini Qırımda qaldırmaylar, çünki Rusiye içün olar «stabilsizlik merkezleri» ola.
«Olarnı artıq Krasnodar ülkesine de avuştırmaylar, bir yerde olmasınlar dep, Rusiye Federatsiyasınıñ uzaq yerlerine alıp keteler. Çünki Krasnodar ülkesinde Ukrayına vatandaşlarınıñ şaraitleri, işğalci akimiyetniñ bergen aq ve mecburiyetlerinen memnüniyetsizlik sebebinden zıddiyetler olğan edi», – dep qayd etti Çistikov.
Mayısnıñ 5-nde Rusiye Federatsiyası kontrolindeki Zaporijjâ vilâyetiniñ akimiyeti cebege yaqın 18 mesken yerniñ sakinlerini tahliye etüv aqqında bildirdi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
