Qırım işğali başlağanından berli Qırımtatar resurs merkezi Qırım yarımadasında Rusiye uquq qoruyıcıları taqip etken eñ az 28 çağına yetmegen bala olğanını qayd etti.
«Gençlerni hususan memuriy davalarda taqip etip, böyle cezalar bereler – ana-babasına para cezası berile ya da bir qaç kün apis cezası. Amma, ne yazıq ki, işğalciler taqip etken balalarnıñ sayısı ep arta. Rusiye esirliginde qalğan büyüklerniñ tam sayısı belli olmağanı kibi», – dep aytıla Qırımtatar resurs merkeziniñ haberinde.
Qırımtatar resurs merkezi böyle taqiplerni qanunsız, siyasiy sebepli ve cinaiy dep saya – Rusiye akimiyeti ve uquq qoruyıcılarınıñ bu siyaseti «balalarnıñ fikir bildirmek ve narazılıq bildirmek ıntıluvlarını bastırmaq, olarnı öz tarafına çekmek içün» yapıla.
Qırımtatar resurs merkezi «Rusiye akimiyeti ve uquq qoruyıcılarınıñ areketlerini bala bulunğan devlet sıñırlarında devletke balanıñ aqlarını ırq, teri tüsü, cinsiyeti, tili, dini, siyasiy ya da diger işançları, milliy, etnik ya da içtimaiy mensüpligine baqmadan, aqlarını qorçalamağa emir etken BM bala aqları nizamnamesinden çekilüv dep saya».
Qırımtatar resurs merkezi aydınlatmaq malümatnı başqa menbalarda tasdıqlamaq imkânsız ola.
Rusiyeniñ Ukrayınağa qarşı büyük istilâsı başlağanından berli Rusiye regionlarında ve işğal etken Ukrayına topraqlarında, hususan Qırımda, yüzlernen insan, şu cümleden çağına yetmegen balalar, terakt, diversiya ya da terror faaliyeti ve Rusiye ordusını «itibardan tüşürüv» ile alâqaları qabaatlavlarınen cinaiy ve memuriy mesüliyetke çekilgen edi. Çağına yetmegenler esasen arbiy komissarlıq ya da naqliyat infrastruktura obyektlerini ateşke berüv, Ukrayınağa qoltutuv risalelerini tarqatuv, internette «Rusiye ordusını itibardan tüşürgen» yazılar yazğanında qabaatlana.
Ukrayına prezidentiniñ Qırım Muhtar Cumhuriyetindeki daimiy temsilcisi Tamila Taşeva haber etkenine köre, 2023 senesi Rusiye Federatsiyasında ve Ukrayınanıñ işğal etilgen topraqlarında ordunı itibardan tüşürgen er altıncı ceza Qırımda qayd etildi. Açıq davalarnıñ sayısı ise 70,6% arttı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
