Noyabrniñ 19-ndan itibaren «ArtPole» agentliginiñ «Qırım. Üçünci ölçev» leyhası İvano-Frankivskte işini devam ete. Üç künlik programma bar.
Teşkilâtçılarnıñ malümatına köre, noyabrniñ 19-nda Çeşitlik odasında mültidistsiplinar ressam Olga Mihaylük ve saundartist Sergey Kravçenko (SK.EIN) «Kimse ada degil» – Qırımğa Horlıdan baquv audiovizual eserini taqdim etecekler.
- Noyabrniñ 20-nde Vagabundo Yerastı Keçitinde Qırım nağmeleri Karpatı nağmelerinen birleşken ve Karpatı ekspeditsiyalarınıñ fotoresimleri ve Han sarayınıñ fotoarhivleri qoşulğan improvizatsiya muzıkal-vizual programma taqdim etilecek.
- Noyabrniñ 21-nde Promprylad.Renovationda «Haytarma. Rustem Skibinniñ avdeti installâtsiyası, beraber resim yapuv seansı ve Pensiya frank pank-formatsiyasınıñ aqşam tedbiri teşkil etilecek.
«Programmanıñ bütün lokatsiyalarında Rustem Skibinniñ (qırımtatar çölmekçisi) ve Olâ Mihaylükniñ vizual işleri taqdim etilecek. Müellifler Olânıñ Rusiye işğal etken Qırımğa seyaat etkende çıqarğan Qırım kerçekliliginiñ iz fotoresimlerini qullanıp, çatlaq ve akislerni ve Rustemniñ çölmekçilik parçalarını tedqiq ete», – dep qayd ete teşkilâtçılar.
Muzıka ve audiovizual installâtsiyalarnı, strit-art ve vesiqalı intervyülarnı birleştirgen «Qırım. Üçünci ölçev» mültidistsiplinar leyhası üç aydır devam ete. İştirakçileri Kalançak, Herson ve Kyivni ziyaret etti. Eñ ğarbiy noqtası İvano-Frankivsk oldı. Teşkilâtçılar leyhanıñ esas vazifesi yarımadanı terk etkenler ve anda qalğanlar ve Qırım meselesinde çezüvlerni qıdırmağa azır olğan er kes arasında bağlarnı qurmaq ola, dep bildire.
