Rostov-na-Donudaki Rusiye Cenübiy okrugınıñ arbiy mahkemesi oktâbrniñ 9-nda Rusiye uquq qoruyıcıları Rusiyede yasaqlanğan, amma bir çoq memlekette faaliyetine izin berilgen "Hizb ut-Tahrir" teşkilâtında iştirak etkeninde ve "akimiyetni zorbalıqnen zapt etmege" azırlanğanında qabaatlap tutqan dört Qırımlı qadınnıñ davasında ilk oturışuvnı keçirecek.
Bu aqta Qırımlı jurnalist ve aq qorçalayıcı Lutfiye Zudiyeva tutulğan qadınlarnıñ anaları bergen malümatqa esaslanıp Facebook saifesinde haber etti.
Berilgen malümatqa köre, oturışuv qapalı rejimde olacaq. Nasiba Saidova, Esma Nimetulayeva, Fevziye Osmanova ve Elviza Aliyeva esnasta Aqmescitteki SİZO-1-den video vastasınen iştirak etecekler.
Davanıñ tahqiqatı endi yekünlendi, cinaiy tahqiqat malümatı ise Rusiye Cenübiy okrugınıñ arbiy mahkemesine berildi. Sentâbrniñ 5-nde qadınlar davalarını incelep başladı.
2025 senesi orta küz ayınıñ 15-nde Rusiye quvetçileri Qırımda dört qırımtatar qadınını tutıp, olarnı Rusiye Ceza kodeksiniñ 205.5 maddesine istinaden (terror teşkilâtınıñ faaliyetinde iştirak etüv) "Hizb ut-Tahrir" davası boyunca qabaatladı.
Orta küz ayınıñ 16-nda Aqmescitteki Rusiye kontrolindeki Kiyev rayon mahkemesi dördüni de eki ayğa SİZO-ğa yolladı.
Qırımtatar resurs merkezi ve "Qırım birdemligi" yazğanlarına köre, qadınlar "terror teşkilâtınıñ" faaliyetini teşkil etkeninde ve akimiyetni zorbalıqnen zapt etmege azırlanğanında qabaatlana. Sentâbrniñ 5-nden olar malümatnı inceledi. Sentâbrniñ 8-nde apis cezası 2026 senesi oktâbrniñ 14-ne qadar uzatıldı.
Esma Nemetullayeva – Bağçasaray sakini, çağına yetmegen beş qıznıñ anası, 2023 senesi oşağan dava boyunca apiske alınğan Remzi Nemetullayevniñ ömür arqadaşı. Elviza Aliyeva – Topçıköy (Dolinnoye) köyünden student. Nasiba Saidova – imamnıñ qızı, Zalanköy (Holmovka) köyündeki bala bağçasınıñ ocası. Fevziye Osmanova Mamaşay (Orlovka) köyünde yaşay ve tükânda çalıştı.
Aq qorçalayıcılar "Hizb ut-Tahrir davaları" boyunca taqiplerni siyasiy sebepli dep saya: teşkilât Rusiyede yasaqlandı, amma Ukrayinada yasaq altında degil, qabaatlav toplaşuv ve diniy edebiyatqa esaslana, zorbalıq delilleri yoq.