Oktâbrniñ 14-nde Kyivde «Qırım platforması» çerçivesinde «Qırım global. Ukrayınanı cenüp vastasınen añlav» halqara konferentsiyası çalışıp başladı.
Konferentsiya Ukrayına cemaat teşkilâtları, ükümeti ve parlamentinen bağ qurmaq içün dünya ekspertlerini birleştirdi. Dünyanıñ cemaat erbapları Ukrayınanı tedqiq ete bilecek, hususan Qırım yarımadasında yaşağan insanlarnı, ukrayınalılarnıñ Rusiye istilâsına tirengenini ve ortaq leyha ve teşebbüsler içün imkânlarnı daa yahşı añlamağa mümkün olacaq.
Tedbir teşkilâtçıları: Ukrayına zaferi halqara merkezi, İnsan aqları media teşebbüsi, İnsan aqları Helsinki birligi, İnsan aqları halqara ortaqlığı, ZMINA, Kyiv-Moğıla akademiyası milliy universiteti, Qırım platforması ofisiniñ yardımınen «Ukrayına. Saba beş» koalitsiyası.
Konferentsiyada cemaat erbapları, alim, Nobel mukâfatınıñ laureatları, Global Cenüp memleketleriniñ ekspertleri – Kolumbiya, Qatar, Çili, İndoneziya, Cenübiy-Afrika Cumhuriyeti, Nikaragua, İndistan, Qazahistan, İran, İtaliya, Meksika, Venesuela, İspaniya, Gana, Urugvay, Keniya, Afğanistan, Filippin, Libiya, Bürkina Faso, Suriye, Türkiye, em de Ukrayına, Norvegiya, İtaliya, İsveçre, Ermenistan ve diger memleketlerden iştirak eteler.
Vatandaş cemiyetinden ğayrı, konferentsiyada Ukrayına prezidentiniñ Ofisi, Ukrayına Yuqarı Radası, Ukrayına Tış işler nazirligi, bir sıra cemaat teşkilâtınıñ vekilleri iştirak etecek, qırımtatar milliy lideri Mustafa Cemilevniñ mahsus muracaatı olacaq.
Qayd etilgenine köre, bu regionlarnıñ memleketleri içün Ukrayına aşayt ve energetika telükesizligi ceetinden müim oldı. Rusiyeniñ Ukrayınağa qarşı yapqan büyük cenki sebebinden Afrika qıtası, Yaqın Şarq ve Cenübiy-Şarqiy Asiyadan bir çoq memleketniñ zahire ve/ya da energetik resurs qıtlığı oldı.
Programmada qayd etilgenine köre, konferentsiya iştirakçileri Rusiyeniñ Ukrayınağa qarşı büyük istilâsınıñ global aqibetlerini, silâlı zıddiyetni toqtatuv yollarını, istilânıñ global aşayt teminlevine tesirini muzakere etecekler. Munaqaşanıñ ayrı mevzusı – dünyanıñ energetik telükesizligi. Kün tertibinde Rusiye istilâsınıñ Rusiye, Ukrayına musulman cemaatlarına ve umumen dünya musulmanlarına yapqan tesiri munaqaşası olacaq.
Konferentsiyanıñ işi bazarertesi bitecek. Konferentsiya aqqında tafsilâtlı malümat Qırım.Aqiqat saytında derc etilecek.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
