Rusiye işğal etken Qırımnıñ şarqında Keriçte silâ toplarınıñ gürültisi eşitildi, dep bildirdi Qırım.Aqiqat mühbiri.
Rusiye kontrolindeki Qırım naqliyat nazirliginiñ yolbaşçısı Nikolay Lukaşenko bildirgenine köre, şeer raketa ücümine oğradı. Patlav sesleri aqqında yerli Telegram kanalları da yazdı.
«Suspilne» cemaat yayınlayıcısınıñ malümatına köre, Keriçte eñ az altı patlav eşitildi, ev camları titredi. ASTRA Telegram kanalı 20 patlav aqqında haber ete.
Lukaşenko haber etkenine köre, eki parom, maşina ve tren, tüşürilgen raketa parçalarından zarar kördi.
Rusiye Federatsiyasınıñ Mudafaa nazirligi Azaq deñizinde sekiz raketa ve Qara deñizde aynı sayıda dron yoq etildi, dep bildirdi. Rusiye arbiyleri yarımadağa ketken eki insansız kater yoq etildi, dep bildire.
Muarririyet Rusiye akimiyetiniñ malümatını teşkerip olamay.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Daa bir patlav 2023 senesi iyülniñ 17-nde oldı. Avgustnıñ 12-nde Rusiye akimiyeti Keriç köprüne yapılğan daa eki ücüm aqqında bildirdi. Yarımadada yüksek (sarı) terror telükesi seviyesi devam ete. Aqmescit ava limanı qapalı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
