Rusiye kontrolindeki Aqmescitniñ Kiyev rayon mahkemesinde «Qırım» mustaqil gazetasınıñ tesisçisi Seyran İbragimovnıñ istinaf şikâyeti baqıldı.
«Qırım esnası» haber etkenine köre, 250 biñ ruble miqdarında para cezası qararı deñişmedi.
Oktâbrniñ 2-nde aynı qarar neşirniñ muarriri Bekir Mamunıñ şikâyeti boyunca da qarşı da çıqarıldı. Rusiye mahkemesi 130 biñ ruble para cezasını deñiştirmedi.
Ekisinde de BM Baş kâtibi António Guterresniñ maruzası derc etilgeni içün malümat serbestligini suistimal etüv qabaatlavı aqqında aytıla. İşbu maruzada Qırım tahqiqat izolâtorlarında insaniyetsiz munasebet, işkence ve insan hırsızlavları aqqında malümat berildi.
«Qırım» gazetası 1989 senesi iyul ayından berli qırımtatar tilinde derc etile ve qırımtatarlarnıñ Qırımğa qaytmasından soñ çıqqan ilk neşirlerinden biri ola.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
