Qırımda iyünniñ 7-nde Rusiye kontrolindeki Aqmescitniñ Kiyev rayon mahkemesi «Qırım» gazetasınıñ muarririyetine Rusiye Federatsiyası Memuriy uquq bozuvları kodeksiniñ 20.3.3 maddesiniñ 1-inci qısmına istinaden (Rusiye Federatsiyası Silâlı quvetlerini itibardan tüşürüv areketleri) 300 biñ ruble para cezasını berdi. Bu aqta qırımtatar faali Elmaz Akimova uquqçı Lilâ Gemeciniñ malümatına esaslanıp, Facebookta bildirdi.
«Keçken mahkeme oturışuvlarında aytqanlarımızdan ğayrı, tesisçi, gazetanıñ muarririyet siyasetinden mesüliyetli degil, jurnalistlerniñ iş faaliyetine kirişmey kibi imaye tarafınıñ delilleri mahkeme qararına tesir etmedi. İmaye tarafınıñ iç bir dlili qararda aks etilmedi. Mahkeme qararı qanun bergen talaplarğa uymağan dava malümatına esaslana. İmaye tarafı bu qararğa qarşı istinaf şikâyetini berecek», – dep bildire uquqçınıñ aytqanlarını Akimova.
Mayısnıñ 17-nde Qırımda Rusiye uquq qoruyıcıları «Qırım» gazetasınıñ baş muarriri Bekir Mamutov ve «Qırım» gazetasınıñ tesisçisi Seyran İbragimovnıñ evlerinde tintüv keçirdi.
Bekir Mamutovğa qarşı Rusiye ordusını itibardan tüşürüv ve «Qırım» gazetasınıñ saytında sahte malümatnı derc etüv manaçığınen eki protokol tizildi. Onıñ davaları Aqmescitniñ Kiyev mahkeme rayonınıñ Mirovoy mahkemesinde ve Kiyev rayon mahkemesinde baqılacaq.
«Qırım» gazetasınıñ tesisçisi Seyran İbragimovğa qarşı aynı maddelerge istinaden eki protokol tizildi.
«Qırım» gazetası 1989 senesi iyül ayından berli qırımtatar tilinde çıqa ve qırımtatarlar Qırımğa qaytqan soñ ana tilinde çıqqan ilk neşirlerden biri ola.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
