«Qırım ğayesi» aq qorçalayıcı teşkilâtı qırımlı aq qorçalayıcı Abdureşit Cepparov Rusiye uquq qoruyıcıları tarafından taqip etilgeni içün Facebookta faaliyetini toqtata, dep haber etti.
Aq qorçalayıcılar bildirgenine köre, Rusiye uquq qoruyıcıları Cepparovnı «Qırım ğayesi» teşkilâtınıñ saifesini idare etkeninde qabaatlay, lâkin teşkilât onıñ faaliyetine alâqası da yoq, dep bildire.
«Taqımımız zor bir saylav yapmağa mecbur oldı: Qırımda insan aqları bozulğanını ve repressiyalar aqqında kerçeklerni aytmağa devam etmek, amma aq qorçalayıcı Abdureşit Cepparovnı telükege oğratmaq ya da bu telükeni uzaqlaştırmaq içün elimizden kelgenini yapmaq. Bütün işimiz insan aqları qıymetlerine esaslana, şunıñ içün nasıl bir qarar alınğanını añlamaq zor degil», – dep haber ete «Qırım ğayesi».
Berilgen malümatqa köre, yarın, Cepparovğa qarşı mahkeme arfesinde, olarnıñ Facebook saifesi «taqip etilüvi içün qolay bir alet olmasın dep», bütünley silinecek.
Rusiye uquq qoruyıcıları qırımlı aq qorçalayıcı Abdureşit Cepparovğa qarşı «Rusiye ordusını itibardan tüşürüv» ve «serbest malümatnı suistimal etüv» maddelerine istinaden eki yañı memuriy dava açtı.
ZMINA aq qorçalayıcı teşkilâtı bildirgenine köre, Abdureşit Cepparovnı «Qırım ğayesi» teşebbüsiniñ saifesini idare etkeninde» qabaatlay ekenler. Saife yarımadada halqara uquq bozulğanına dair haber ve insan aqları bozulğanına dair malümatlar derc ete».
Cepparovnıñ aytqanına köre, o, bu qabaatlavlarnen razı degil. Onıñ bildirgenine köre, «Qırım ğayesiniñ» quruluvına alâqası olsa da, al-azırda bu aq qorçalayıcı leyhanen oğraşmay.
Rusiye uquq qoruyıcıları Abdureşit Cepparovnı aprelniñ 25-nde saba evinde tintüv keçirgen soñ tuttı. Evinde ömür arqadaşı ve 14 yaşında qızı bar edi. Cep telefonları alındı ve advokatnı çağırmağa izin bermedilr,
Rusiye kontrolindeki Qırımnıñ Qarasuvbazar rayon mahkemesi onı «poliske riayet etmegeni» içün (Rusiye Memuriy uquq bozuvları kodeksiniñ 19.3 maddesi) 12 künge apiske aldı.
Abdureşit Cepparov ilk sefer tutulmay. Bıltır mart ayında da evi tintilgen edi. Bundan soñ Rusiye kontrolindeki Qarasuvbazar rayon mahkemesi aq qorçalayıcı ve qırımtatar milliy areketiniñ veteranını apiske alğan edi. O vaqıt Cepparov içtimaiy ağlarda «natsist atributikasınıñ ve timsalleriniñ propagandası» qabaatı ile 15 künge apiske alınğan edi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
