Qırımda eki künden berli blekaut devam ete. Rusiyeniñ "Krımenergo" malümatına köre, bu magistral energetika hatlarında olğan qazanen bağlı. Anda mesken yerlerde elektrik energiyası tehnologik imkânlarğa köre berildi, cedveller vaqtınca çalışmay, dep qayd ettiler.
Aqmescit, Aqyar, Yalta, Keriç, Saq, Kezlev, Kefe, Qarasuvbazar ve Qurman rayonları ışıqsız qaldı.
Qırımnıñ Rusiye yolbaşçısı Sergey Aksenovnıñ bildirgenine köre, sıñırlavlar Ukrayinanıñ yarımada tışında energetika infrastrukturasına qarşı ücüminen bağlı.
"Al-azırda ğayrıdan tiklev işleri yapıla, ücüm aqiyebetlerini tezce yoq etmek ve energetka teminlevini ğayrıdan tiklemek içün energetikacılar elinden kelgenini yapalar", – dedi o.
Aqyarda vaziyet aynı. Şeerniñ Rusiye yolbaşçısı Mihail Razvojayevniñ aytqanına köre, elektrik energiyası cedvelge köre berilmey.
"Müim olğan obyektler elektrikanen temin etildi. Elektrik energiyası hastahanelerge, gidrotüyüm ve diger müim obyektlerge kele", – dep añlattı o.
Saq şeeriniñ Rusiye memuriyet yolbaşçısı Yuliya Predıbaylo bildirgenine köre, elektrika künde eñ ziyade üç saat berilecek.
"Krımtrolleybus" müessisesi Aqmescit soqaqlarına trolleybuslar çıqmaycaq, dep bildirdi. Yolcularnı taşımaq içün diger taşıyıcılarnıñ naqliyatı celp etilecek. Avtobuslarnıñ areket cedvelinde deñişmeler ola bile, çünki elektrika problemleri vaqtında yaqarlıq stantsiyalarında yaqarlıq tolduramadılar.
Aluşta Rusiye memuriyetiniñ yolbaşçısı Galina Ogneva bildirgenine köre, №2 trolleybus elektrik energiyası olmağanı içün vaqtında qatnamay. Onıñ yerine 25-30 daqqada bir avtobus olacaq.
"Voda Krıma" Rusiye müessisesi yarımadanıñ büyük qısmı hatlardaki qazalar sebebinden suvsız olacaq, dep bildirdi.
Aqmescitte sert bir cedvel belgilendi: suv tek saat 06:00-dan 10:00-ğa qadar ve 18:00-den 22:00-ge qadar berilecek. Yedi Quyu filialında da vaziyet oşay (Şçolkino şeeri ve Mısovoye, Kalinovka, Semenovka köyleri), anda suv saat 06:00-dan 10:00-ğa qadar ve saat 17:00-den 21:00-ge qadar berile. Kefede Çelnokovskiy massivinde suv saat 06:00-dan 13:00-ke qadar v 17:00-den 22:00-ge qadar berile.
Aluşta ve yaqın qasabaları, Bağçasaray ve rayonı, Qarasuvbazar, Seyitler ve İçki rayonları, Qurman rayonı, Kezlev, Keriç, Saq, Sudaq, Ermeni Bazar ve Or Qapı şeerleri suvsız qaldı.
Suv ketirile. Suv taşıyıcılarınıñ areket cedvelleri ve bulunğan adresleri Rusiye şeer ve rayon memuriyetleriniñ resmiy saifelerinde derc etile.
Elektriçkalarnıñ areketi de toqtatıldı. Cenübiy şeer yolcu şirketiniñ malümatına köre, Aqmescit – Kezlev, Kezlev – Aqmescit, Aqmescit – İnkerman-1 ve İnkerman-1 – Aqmescit yönelişleri de çalışmay.
Qırımda Ukrayina uçucısızları Rusiyeniñ Krasnodar ülkesindeki ast stantsiyağa darbe endirgeni içün elektrika söndürilgen edi. Ukrayina Mudafaa quvetleri energetika obyektlerine qarşı ücümleri aqqında daa bildirmedi.