Aqyarğa raketalarnen ücüm etildi. Birinci ücüm gece 1:55-te patlavlarnen oldı. Ekincisi – 40 daqqadan soñ.
«Eki ücüm vaqtında «nişanğa yetüv»kibi patlavlar eşitildi. Darbe vaqtında qızantı oldı. Ücümniñ ekinci dalğasından soñ bir qaç patlav eşitildi», – dep haber ete Qırım.Aqiqat mühbiri.
Onıñ aytqanına köre, bir qaç raketa parçası Lübimovka qasabası rayonında tüşti. Aqyarnıñ merkezinde ava telükesi ilân etilmedi.
Aqyarnıñ Rusiye yolbaşçısı Mihail Razvojayev ücümni tasdıqlap, bir qaç raketa Qara deñizde ve «Belbek» uçaq alanı rayonında tüşürildi, dep bildirdi.
Polüşko köyü rayonında tüşken parçalar sebebinden yanğın çıqtı, onı söndürgenler, dep qoştı Razvojayev. Zararlar yoq, dep ayttı o.
Aqyarnıñ Rusiye yolbaşçısı bildirgenine köre, Fedorovskaya soqağı rayonında tüşürilgen raketa parçaları şahsiy sektorğa tüşti. Yaralanğanlar yoq, dep qoştı şeerniñ Rusiye yolbaşçısı.
Yerli telegram kanalları ücümniñ «eki dalğası» aqqında bildirdi, ATACMS raketaları qullanıldı. Umumen 8 raketa qullanıldı.
«Krımskiy veter» Telegram kanalı haber etkenine köre, patlavlar Kezlevde ve Bağçasaray rayonında eşitildi.
Rusiye Mudafaa nazirligi bildirgenine köre, Qırımda 10 ATACMS raketası urıp tüşürildi. Rusiye akimiyetiniñ malümatı mustaqil menbalardan teşkerilmeli.
Ukrayına arbiyleri Qırımğa qarşı ücümni daa izaatlamadı.
Mayısnıñ 13-nde Rusiye Mudafaa nazirligi gece işğal etilgen Qırımda Storm Shadow raketaları ve uçucısızlar tarafından ücümge oğradı, dep bildirdi.
Rusiye müessisesi yarımadada gece dört Storm Shadow ve yedi uçucısız urıp tüşürildi, dep bildire. Rusiye akimiyetiniñ malümatını mustaqil menbalarda teşkermek kerek.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Daa bir patlav 2023 senesi iyülniñ 17-nde oldı. Avgustnıñ 12-nde Rusiye akimiyeti Keriç köprüne yapılğan daa eki ücüm aqqında bildirdi. Yarımadada yüksek (sarı) terror telükesi seviyesi devam ete. Aqmescit ava limanı qapalı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
