Qırımnıñ haber saifeleri dron uçuşları, mobil ateş gruppalarınıñ atışı, Qırım yarımadasınıñ çeşit regionlarında bir çoq patlav ve Aqyarda elektrik berüv cedvelleriniñ sertleştirilüvi aqqında bildirdi.
"Krımskiy veter" Telegram kanalı abunecileriniñ malümatına esaslanıp haber etkenine köre, patlavlar Saq, Kezlev, Kefe ("Kafa" elektrik stantsiyası yanında), Aqmescit ve Aqmescit rayonında (şu cümleden Sarabuz qasabasında ve Tavrik GES rayonında), İçki, Aqyar ve Aluştada patlavlar eşitildi.
Aqyarnıñ Rusiye akimiyeti şeerde üç kere ava telükesini ilân etti. Şeerde energetikağa qarşı toqtamağan darbeler sebebinden elektrik teminlev cedvelleri sertleştirildi.
"ÇP/Sevastopol" Telegram kanalı bildirdi ki: "Qırımnıñ energetik sistemasında küç yetersizligi sebebinden "3-ten soñ 3" cedveline riayet etmek şimdi imkânsız ola. Sıñırlavlar vaqtında şeer "6-dan soñ 2" rejiminde çalışacaq – ışıqlı eki saat ve elektriksiz altı saatqa qadar".
Rusiye Mudafaa nazirligi saba 15 Rusiye regionı, işğal etilgen Qırım ve Azaq ve Qara deñizlerinde 325 ukrayin uçucısızını tuttı ve yoq etti, dep esabat berdi.
Ukrayina arbiyleri Qırımdaki adiselerni izaatlamadı.
Qırım.Aqiqat bu malümatnı cenk vaziyetinde mustaqil şekilde teşkerip olamay.
2022 senesinden başlap Qırım yarımadasınıñ territoriyasına aman-aman er kün pilotsız uçaq ve raketalar ücüm ete. Çoqusı allarda Rusiye Mudafaa nazirligi ya da Rusiye akimiyeti, bu malümatnı tasdıqlasa bile, arbiy obyektlerge zarar ketirilgenini tasdıqlamay.