Rusiye Mudafaa nazirligi bildirgenine köre, noyabrniñ 2-ne keçer gecesi Qara deñizde bir dron urıp tüşürildi ve daa beş dron Qırımda tutuldı.
Uçucısız çeşiti aytılmay: bu sefer nazirlikniñ haberinde «uçaq çeşitli cihah» ibaresi yoq.
Gece Qırım ve civarlarından ava telükesi ya da ava mudafaa sistemasınıñ atışları aqqında haber etilmegen edi.
Ukrayına tarafı bu malümatnı izaatlamadı.
Oktâbrniñ 30-nda Ukrayına arbiyleri ve Rusiye Telegram kanalları Ölenivka rayonında Rusiye ava mudafaa sistemasınıñ mevzilerine qarşı darbe aqqında bildirdi. Tasdıqlanmağan malümatqa köre, darbe neticesinde 17 Rusiye arbiyi elâk oldı. Diger versiyağa köre, darbe Kezlev civarındaki Terekli Qoñrat (Moloçnoye) köyü rayonındaki ava mudafaa mevzilerine qarşı yapıldı, neticede S-300 zenit-raketa kompleksi yoq etildi.
Avgust ayında Ukrayına Mudafaa nazirligi Baş istihbarat idaresiniñ yolbaşçısı Kırılo Budanov Qırım.Aqiqatqa bergen intervyüsında Ukrayına quvetleri duşmanğa ücüm etmek içün Qırımda er yerge irişe bile, dep ayttı. Onıñ bildirgenine köre, Qırımnı işğalden qurtarmaq içün çeşit variantlar bar, amma «cenksiz, uruş areketlersiz bunı yapmaq imkânsız».
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
