Parijdeki «İstegenler koalitsiyası» sammitinden soñ Ukrayinanıñ Poloniya elçisi Vasıl Bondar «kimse topraq uzlaşuvlarına razı olmaz – ne Qırım, ne de Donbasta», dep ayttı. Bu aqta o, martnıñ 28-nde RMF FM yayınındabildirdi.
«O qadar qan töktik, o qadar şey berdik, kimse ne Qırımda, ne de Donbasta bir uzlaşuvğa razı olmaycaq. Soñki Rusiye askeri Ukrayinanı terk etkenine qadar biz siyasiy ceetten küreşecekmiz», – dedi Bondar.
Bondar bildirgenine köre, Qırımnıñ cenk ya da diplomatik yolnen işğalden azat etilüvi «tek vaqıt meselesi» ola. Onıñ fikirince, ABD erte ya da keç Rusiye tarafınen uzlaşmağa olmay degen hulâsa çıqardı.
«Olar üçünci cian cenkinden qorqa, ve bu yönelişte keteler, çünki istilâcınen uzlaşalar. Biz maqsadımızda turmalımız: topraq bütünligi, cenk içün mesüliyet ve Ukrayinanıñ ğayrıdan tiklenmesine isse», – dep qoştı o.
Martnıñ 20-nde Norvegiya baş naziri Yonas Gar Stere ile matbuat konferentsiyasında çıqışta bulunğan Ukrayina lideri Volodımır Zelenskıy daa evel Amerika prezidenti Donald Trumpqa Qırım yarımadası ukraiyn halqı içün ne qadar müim olğanını añlatqanını tarif etti. O, ABD prezidenti Donald Trumpnen telefonda Qırımnıñ Rusiye olaraq tanılmasını muzakere etmedi, dep ayttı.
Semafor neşri ABD işğal etilgen Qırımnı Rusiyeniñ bir qısmı olaraq resmiy şekilde tanımaq imkânını baqqanını bildirgen edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
