Rusiye kontrolindeki Qırım Yuqarı mahkemesi yerli sakinni devlet hainliginde qabaatlap, 18 yılğa üküm etti, dep haber ete "Qırım esnası" aq qorçalayıcı merkezi.
Rusiye prokuraturasınıñ malümatına köre, qırımlı "mahsus arbiy operatsiya keçirilüvine qarşı çıqıp", Ukrayina telükesizlik hızmetiniñ vekillerinen içtimaiy ağlarda yazışqan ve mudafaa inşaatı aqqında malümat bergen.
"Mahküm etilgenniñ bilgileri ne ükümde, ne de mahkemeniñ resmiy saytında aydınlatılmay. Dört mahkeme oturışuvı ve üküm seslendirilüvi qapalı şekilde oldı. Bundan ğayrı, üküm seslendirilgen kün ve yer mahkeme saytında aydınlatıldı. Bular episi mahkeme esnasınıñ açıqlığına menfiy tesir ete", – dep yaza "Qırım esnası".
Aq qorçalayıcılar esnasta reislik yapqan qadınıñ mustaqilligi ve tarafsızlığı "sebepli şübheler" doğura, çünki ükmüni devlet hainligi sebebinden Ukrayina mahkemesi tarafından 14 yılğa üküm etilgen qadı Alla Hineviç çıqardı.
"Bu sebepten Ukrayina mahsus hızmetleri içün çalışqanında qabaatlanğan şahıslarğa qarşı mahkeme tarafsızlığı ciddiy şübheler doğura. Qayd etmeli ki, Hineviç Qırım Yuqarı mahkemesinde devlet hainligi (bıltır bu maddege istinaden 11 üküm) qabaatlavı boyunca baqılğan dava sayısına köre faal qadı ola", – dep haber ete "Qırım esnası".
Qırımlınıñ açıq izaatı belli degil.
Aq qorçalayıcılar devlet hainligi, Ukrayina ile işbirligi, casuslıq ve diversiya maddelerine istinaden davalarnıñ sayısı artacaq, dep tahmin ete. Şimdi FSB böyle davalarnı aman-aman er kün aça, 2014 senesine qadar ise olarnıñ sayısı yılda eñ çoq 10 edi.