Nikolay Polozovnıñ malümatına köre, «Rusiyede ve işğal etken topraqlarında, hususan işğal altındaki Qırımda repressiyalarnıñ sayısı toqtamayıp arta».
«Bes-belli ki, Rusiye uquq qoruyıcıları işleri semereli olğanını köstermek, statistik raqamlarnı eyiliştirmek içün cinaiy davalarnı uydura, devlet hainligi qabaatlavlarınen insanlarnı apiske ala. Böyle davalarnıñ sayısı yüzlernen olacaq, dep tüşünmeyim. Rusiye akimiyeti bir qaç örnek dava yapıp, repressiv maşina kelişmegenlerge yapqanlarını köstere. Qalğanlarını böylece qorquza. Böyle davalar olacaq, lâkin bu repressiyalar kütleviy olacaq, dep tüşünmeyim», – dedi aq qorçalayıcı.
Rusiye uquq qoruyıcılarınen faal işbirligi yapqan Rusiye tarafdarı faal, «Krımskiy SMERŞ» leyhasınıñ koordinatorı Aleksandr Talipov bildirgenine köre, içtimaiy ağlarda Ukrayına tarafdarı olğan qırımlılarnı tapmaq içün «iş yapıla».
«İçtimaiy ağlarda ya da arabada Ukrayına bayrağı insannıñ fikrini köstere – Ukrayına mahsus hızmetleriniñ diqqatını böyle celp ete bile. «Beklegenler» diversiyalarnen telükeli ve duşmanlarğa malümat bere bile», – dep tüşüne Talipov.
Onıñ bildirgenine köre, Qırımda 500-den çoq insan Ukrayınağa qoltutqanı içün memuriy mesüliyetke çekildi.
«Bir qaç on dava Rusiye Silâlı quvetlerini itibardan tüşürüv ve natsizmni aqlav sebebinden açıldı. Ve, ebet, devlet hainligi bar, çünki «beklegenlerimiz» tezden böyle madde alacaq», – dey Talipov.
«Rusiye ordusını itibardan tüşürüv» maddesi Rusiye qanunlarında 2022 senesi martnıñ 4-nde peyda oldı, Rusiyeniñ Ukrayınağa qarşı büyük istilâsını başlatqan ilk künleri edi. Qırımda Rusiye ordusını itibardan tüşürüv sebebinden taqipler bitmey. Qırımdaki Rusiye akimiyeti insanlar bir-birini çaqsın dep areket ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
