İyünniñ 18-ne keçer gecesi Qırımda patlavlar, Rusiye Federatsiyasınıñ ava mudafaa işi ve dronlar eşitildi, dep haber ete Qırımnıñ Telegram kanalları.
"Krımskiy veter" Telegram kanalı Aqşeyh köyü rayonında tahminen 20 patlav aqqında bildirdi. Bu köy civarında Şimaliy-Qırım demiryol köprüne qarşı ücüm aqqında haber etildi. Bunddan ğayrı, yaqınlardaki maşina köprü darbege oğradı. NASA FIRMS uydu fotoresimlerinde Aqşeyh rayonında büyük yanğın qayd etildi.
İyünniñ 18-nde saba Ukrayina Silâlı quvetleriniñ Baş ştabı bu darbeni tasdıqladı.
"Askerlerimiz Donetsk vilâyetindeki Granitnoye mesken yeri cevarında Kalçik özeniniñ maşina köprüne, vaqtınca işğal etilgen Qırım Muhtar Cumhuriyetindeki Aqşeyh rayonında Şimaliy-Qırım kanalında demiryol köprüne qarşı ücüm etti. Bu obyektler duşman tarafından arbiy taşıma ve işğalci ordunıñ logistikasını temin etmek içün qullanıldı", – dep aytıla haberde.
Bundan ğayrı, içtimaiy ağlarda İslâm Terek rayonınıñ Oy Quyu (Vladislavovka) stantsiyası civarında ve Herson vilâyetindeki Arabat Belinde Promoin boğazınıñ maşina köprüne qarşı darbeler aqqında haber etildi. Bu malümat qoşma menbalarda tasdıqlanmalı.
2022 senesinden başlap Qırım yarımadasınıñ territoriyasına aman-aman er kün pilotsız uçaq ve raketalar ücüm ete. Çoqusı allarda Rusiye Mudafaa nazirligi ya da Rusiye akimiyeti, bu malümatnı tasdıqlasa bile, arbiy obyektlerge zarar ketirilgenini tasdıqlamay.