Qırımda soñki künü 1181 yañı koronavirus hastası qayd etildi, bu tünevinki rekord raqamlardan daa az oldı.
«Keçken künü 188 hasta hastahanege alındı, bütün vaqıt devamında 54 903 kişi hastahanede bulundı. Bir künde 1 332 insan tüzeldi, bütün müddet devamında 136 639 kişi yahşı oldı», – dep aytıla haberde.
Bundan ğayrı, 6 vefat qayd etildi. Pandemiya başlağanından 4 848 insan keçindi.
Aqyarda fevralniñ 21-nde saba COVID-19 hastalarınıñ sayısında yañı rekord oldı.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
COVID-19 koronavirus yuqunçı
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
