Qırımda keçken künü COVID-19 hastalarınıñ sayısı artqanını qayd ettiler – fevralniñ 17-nde saba 1195 yañı koronavirus hastası qayd etildi, bu bir kün evelsi olğan raqamdan daa yüksektir, dep bildire Qırımnıñ Rusiye sağlıq nazirliginiñ matbuat hızmeti.
«Umumen 149 151 COVID-19 hastası qayd etildi. Bir künde 1 497 insan yahşı oldı, bütün müddet devamında 133 099 kişi tüzeldi», – dep aytıla haberde.
Müessise, bir künde altı insan koronavirus yuqunçından vefat etti, dep bildirdi.
Hatırlatamız, Qırım sağlıq nazirligi bir kün evelsi 1080 yañı COVID-19 hastası aqqında bildirgen edi.
Qırım ve Aqyarnıñ Rusiye akimiyeti ilk «omikron» variantlı hastalar qayd etildi, dep tasdıqladı. Qırımda hastalar içün qoşma yerler açıldı. Aqyarda sıñırlav tedbirleri kirsetildi.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
COVID-19 koronavirus yuqunçı
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
