Qırımda bir künde 221 yañı COVID-19 hastası qayd etildi, bu tünevinki raqamdan daa yüksek oldı. Bu aqta Qırımnıñ Rusiye Sağlıq nazirligi bildirdi.
Resmiy malümatqa köre, 220 insan yahşı oldı, 10 hasta vefat etti.
Yanvarniñ 19-nda Sağlıq nazirligi bir künde 199 hasta ve doquz vefat aqqında bildirdi.
Yanvarniñ 19-nda Rusiye kontrolindeki Qırım akimiyeti COVID-19 pandemiyasınen bağlı yañı sıñırlavlar kirsetti. 60 yaştan büyük Qırım sakinleri izolâtsiyada qalmalı.
Bundan ğayrı, yañı sıñırlavlarğa köre, Qırım müessiseleri hadimleriniñ 50%-ını uzaqtan iş rejimine keçirmeli.
Yanvarniñ 17-nden itibaren Qırımda kovidnen bağlı sıñırlavlar quvetleştirile, dep bildire akimiyet. Aş müessiseleri, alış-veriş merkezleri, salon, sauna, fitnes-merkezleri, teatr ve kinoteatrlerde ziyaretçilerden kene QR-kodlar talap etilmeli.
Restoranlarda eglence tedbirleriniñ keçirilüvi yasaqlana. Hostel işiniñ yasağı «hususiy emirge qadar» uzatıldı. Kütleviy tedbirler de yasaqlandı.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
