Qırımda keçken künü 478 koronavirus hastası qayd etildi, tünevin daa çoq hasta bar edi. Bu aqta Qırımnıñ Rusiye sağlıq nazirliginiñ er künlik monitoringinde aytıla.
Koronavirustan vefat etkenlerniñ sayısı yüksek qala – bir künde 23 kişi vefat etti, pandemiya vaqtında 3583 COVID-19 hastası vefat etti.
«119 027 COVID-19 hastası qayd etildi. Bir künde 498 insan yahşı oldı, bütün müddet devamında 106 678 kişi tüzeldi», – dep aytıla Sağlıq nazirliginiñ haberinde.
Tünevin Qırımda 513 koronavirus hastası ve 24 vefat aqqında haber etildi.
Oktâbrniñ 20-nde yarımadada koronavirus ile küreş tedbirleri quvetleştirildi. Bundan evel Qırımda koronavirus pandemiyası sebebinden ilân etilgen yüksek seviyeli azırlıq rejimi dekabr ayına qadar uzatıldı. Oktâbrniñ 11-nde Qırımda yañı koronavirus sıñırlavları kirsetildi.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
COVID-19 koronavirus yuqunçı
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.