Qırımda keçken künü 791 koronavirus hastası qayd etildi, bu bir kün evelsi derc etilgen raqamlardan kene çoq oldı ve Qırımda pandemiya vaqtında bir künde qayd etilgen yañı rekord ola.
Qırımnıñ Rusiye sağlıq nazirliginiñ malümatına köre, bir künde 15 koronavirus hastası vefat etti.
«Umumen (pandemiya vaqtında – QA) 102 835 COVID-19 hastası qayd etildi. Bir künde 746 insan yahşı oldı, bütün müddet içinde 90 600 kişi tüzeldi», – dep aytıla müessise malümatında.
Bir kün evelsi 783 koronavirus hastası ve 19 vefat aqqında haber etilgen edi.
Oktâbrniñ 20-nde yarımadada koronavirus ile küreş tedbirleri quvetleştirildi. Qırımnıñ Rusiye yolbaşçısı Sergey Aksenov oktâbrniñ 30-ndan noyabrniñ 7-ne qadar raatlıq künlerini ilân etti. Bundan evel Qırımda koronavirus pandemiyası sebebinden ilân etilgen yüksek seviyeli azırlıq rejimi dekabr ayına qadar uzatıldı. Oktâbrniñ 11-nde Qırımda yañı koronavirus sıñırlavları kirsetildi.
Noyabrniñ 8-nden itibaren Qırımda pandemiya sebebinden musafirhanelerde, şifahanelerde ve diger yerlerde yer ayıruv ve qaluvnen bağlı yañı qaideler işke tüşürildi.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
