Qırımda bir künde COVID-19-dan vefat etkenlerniñ sayısı kene arttı – keçken künü Rusiye kontrolindeki Qırım sağlıq nazirligi 16 vefatnı qayd etti.
Müessise malümatına köre, umumen pandemiya vaqtında Qırımda 1898 insan koronavirus yuqunçından vefat etti.
«5491 insan (COVID) ambulator tedaviylevde buluna, 3134 kişi (COVID ve pnevmoniya) hastahanede yata. Umumen (pandemiya vaqtında – QA) 63 627 COVID-19 hastası qayd etildi. Tüzelgen 53 045 kişi hastahaneden yiberildi», – dep aytıla müessise haberinde.
Keçken künü Qırımda 394 yañı koronavirus hastası qayd etildi.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
COVID-19 koronavirus yuqunçı
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
