Qırım ve Aqyardaki Rospotrebnadzor idaresi bütün yarımadada koronavirus hastalarınıñ sayısı artqanını qayd ete. Bu aqta iyünniñ 30-nda Qırımnıñ baş sanitar ekimi Natalya Penkovskaya bu yuqunç ile küreş operativ ştabınıñ toplaşuvında ayttı.
«Yañı koronavirus yuqunçına oğrağanlarnıñ sayısı arta. Bu tendentsiya bütün Qırımda qayd etile. Bundan ğayrı, hastahaneden tış pnevmoniyada da aynı tendentsiya ve dinamika körüne. Soñki eki aftada hastahaneden tış pnevmoniya seviyesi üçte birge arttı», – dep tarif etti Penkovskaya.
Onıñ malümatına köre, eñ çoq Aqmescit, Aluşta, Keriç ve Yaltada pnevmoniya sayısı arta. Koronavirus ve hastahaneden tış pnevmoniya hastaları içün yerler açıla.
Penkovskaya, bir aftada vefat sayısı üçte birge arttı, dep qayd etti. Eñ çoq 50-64 yaşında hastalar vefat ete.
Qırımda koronavirus hastalarınıñ sayısı yanvar ayında olğan raqamlarğa yaqınlaştı. Eñ yaqın eki aftada hasta sayısı eksilecek, dep beklemege kerekmey, dep bildirdi Penkovskaya.
Keçken künü Qırımda 294 yañı koronavirus hastası qayd etildi. Qırımnıñ sağlıq nazirligi malümatına köre, bir künde 7 hasta koronavirustan vefat etti, pandemiya vaqtında 1505 kişi vefat etti.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
COVID-19 koronavirus yuqunçı
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
