Aprel başından Ukrayınadaki cenkte iştirak etkenlerge topraq damartılarınıñ berilüvi aqqında tahminen 150 buyruq çıqarıldı, dep bildirdi Qırımnıñ Rusiye parlamentiniñ yolbaşçısı Vladimir Konstantinov. Bu aqta TASS yaza.
«Bugünki künde «mahsus arbiy operatsiya» (Rusiye akimiyeti Ukrayınadaki cenkni böyle adlandıra – QA) iştirakçilerine topraq damartılarınıñ berilüvi aqqında tahminen 150 ferman berildi. Memuriy belediye qurulışlarında bereler. Yani ariza bergenlerniñ Aqmescitke kelip, vesiqa almağa kerekmey, Mülk nazirliginiñ hadimleri bulunğan yerlerinde buyruqlarnı bere. Yalta, Aluşta, Saq ve Saq rayonı, Kezlev, Aqmeçit rayonlarına barğanlar. Nevbetteki ziyaret Keriç ve Qurman rayonına olacaq», – dep qayd etti o.
Konstantinov cenk iştirakçileri nevbetke turğanını ve topraq damartısınıñ berilüvi aqqında ariza bere. Aynı vaqıtta parlament yolbaşçısı tam raqamnı aytmadı.
2022 senesi dekabr ayında Qırımnıñ Rusiye parlamenti Ukrayınağa qarşı cenkte iştirak etken qırımlılarğa bedava topraq damartılarını bermege izin berdi. Aprelniñ 7-nde belli olğanına köre, Rusiye kontrolindeki Qırım akimiyeti Ukrayınağa qarşı cenk iştirakçilerine topraq damartılarını berüv fermanlarını berip başladı. TASS Rusiye agentliginiñ malümatına köre, başta umumen 56 gektarlıq 511 damartı azırlandı. Episi Saq rayonında yerleşe.
Ukrayına akimiyeti bu qararlarnı boş saya ve Qırım Kyiv kontroline qaytqanda olar lâğu etilecek, dep tenbiley.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
