Rusiye uquq qoruyıcıları Qırımda "casuslıqta" qabaatlanğan 59 yaşında adamnı tuttı. Bu aqta Rusiye kütleviy haber vastaları FSB Cemaat bağları merkeziniñ malümatına esaslanıp bildirdi.
Berilgen malümatqa köre, Foros sakini Ukrayinağa Rusiye Federatsiyasınıñ sıñır hızmeti obyektleri yerleşken mevziler aqqında malümat bergen eken.
Adı ve soyadı aytılmay. FSB derc etken videoda tutulğan kişi olaraq tanıtılğan ve beti qapatılğan kişi Rusiye uquq qoruyıcılarınıñ malümatını tasdıqlay. Bu videonıñ basqı altında çıqarılması mümkün edi. FSB malümatınıñ doğrulığını cenk vaziyetinde teşkermek imkânsız ola.
Erkekke qarşı cinaiy dava açıldı, 20 yılğa qadar apiske alınması mümkün. Ukrayina tarafı bu haberlerni izaatlamadı.
Rusiyede ve onıñ tarafından işğal etilgen topraqlarda quvetçiler Ukrayina tarafdarlarını taqip eteler. Rusiye tarafdarı olğan Qırımlı bloger Aleksandr Talipov öz telegram kanalında Ukrayinağa qoltutqan Qırımlılarnıñ şahsiy malümatlarını derc ete. Böyle şikâyetlerniñ neticesinde Qırımlılar RF ordusını "itibardan tüşürüv" içün yaqalana ve memuriy ve cinaiy mesüliyetke çekile.
Aq qorçalayıcılar, Qırımda Rusiye quvetçileri tarafından açılğan devlet hainligi, Ukrayina ile işbirlik, casuslıq ve diversiya maddeleri boyunca davalarnıñ sayısı artacağını tahmin eteler. Şimdi FSB bu kibi davalarnı aman-aman er kün aça 2014 senesine qadar ise yılda 10 dava açıla edi.