Rusiye işğal etken Qırım camilerinde ruslaştıruv ket-kete daa faal kete, qırımtatar milliy areketiniñ veteranlarını bu pek qasevetlendire. Bu aqta yerli cemaatçılardan biri, adı telükesizlik maqsadınen aydınlatılmağan qırımtatar milliy areketiniñ veteranı Qırım.Aqiqatqa tarif etti.
Onıñ aytqanına köre, soñki vaqıtları Qırım camilerinde diniy subetler rusça keçe.
"Ne yazıq ki, devam etken Qırım ilhaqı ve Rusiye akimiyetiniñ tasil müessiselerinde qırımtatar tilini ögrenüvni qısqartması qırımtatar yaşlarınıñ ana tilini yaramay bilgenine sebep oldı, bir çoq genç ana tilini iç bilmey. Endi yaşlar camide rusça bilgi berilmesini talap ete, çünki ana tilini añlamaylar. Bu yıl bir qaç cami rus tiline keçmege mecbur oldddı. Yerli Rusiye tarafdarı müftiligine qarşı iddialarımız pek çoq, amma bu olarnıñ teşebbüsi degil, müftilik qırımtatar tilinde subet keçirilmesini istey, amma ilhaq şaraitlerinde halqımıznıñ, birinciden gençlerniñ ruslaşuvı inkişaf ete", – dep tarif etti cemaatçı.
Qırımtatar Milliy Meclisiniñ reisi Refat Çubarovnıñ malümatına köre, al-azırda Qırımda qırımtatarlarnıñ sayısı – 350 biñden az degil, amma ana tilini pek az kişi bile, bu da ruslaştıruv ve assimilâtsiya sebebi ola.
Rusiye akimiyeti bu vaziyetni izaatlamadı. Qırım ve Aqyar musulmanları Rusiye diniy idaresi diniy metinlerni rusçağa tercime etip tarqatqan edi.