Rusiye Adliye nazirligi iyünniñ 26-nda çetel agenti olaraq tanılğan şahıs ve teşkilâtlarnıñ cedvelini kenişlitti. Bu aqta cuma künü müessiseniñ saytında haber etile.
Cedvelde yañı adlar arasında "Qırım birdemligi" aq qorçalayıcı vatandaş areketi bar. Rusiye memurlarınıñ fikirince, areket çetel agentiniñ malümatını tarqattı, "halqara terror teşkilâtlarınıñ iştirakçileri ve Ukrayina devlet akimiyetiniñ organlarınen" iş tuttı.
Qırım portalı qayd etkenine köre, cedvelge qırımlılar Server Mustafayev, Dilâver Memetov, Mustafa Seydaliyev, Emil Kürbedinov, Edem Semedlâyev, Lilâ Gemeci, Server Çolakçik, Lutfiye Zudiyeva, Zedin Acikelâmov, Ruslan Paralamov, Mümine Saliyeva kirdi. Bundan soñ olar çetel agenti işaretini qoymaq kerekler.
"Qırım birdemligi" Rusiye Adliye nazirliginiñ qararını şimdilik izaatlamadı.
«Qırım birdemligi»
"Qırım birdemligi" cemaat areketi 2016 senesi aprelniñ 9-nda apiske alınğanlarnıñ soy-sopları, advokat ve faaller tarafından siyasiy repressiyalarnıñ qurbanlarını qorumaq içün resmiy olmağan aq qorçalayıcı teşkilât olaraq quruldı. Barışıqsever vatandaşlar memuriy ve cinaiy taqipke oğratıla, uydurılğan qabaatlavlarnen izolâtor ve koloniyalarda tutula. Qırımda insanlarğa milliy, diniy ve siyasiy alâmetlerge köre basqı yapıla.
Advokat Emil Kurbedinov koordinatorı olğan "Qırım birdemligi" uquqiy aq qorçalayıcı ofisinde siyasiy sebepli memuriy davalarda er kün advokat ve uquqçı aq qorçalayıcılar çalışa.
Olar "telüke gruppalarına" (vatandaş faalleri, jurnalist, bloger, imam, din teşkilâtları vekilleri, Rusiyede yasaqlanğan Qırımtatar Milliy Meclisi, Hizb ut-Tahrir, "Tebliğ Cemaatı" kibi teşkilâtlarnıñ vekilleri) ilk uquqiy mesleat bere. Advokatlar siyasiy mabüslerniñ azat etilüvi ve ayırım, dinlerara ve milletlerara ayırımğa qarşı küreşke büyük diqqat ayıra.