Aqmescitte dekabrniñ 17-nde aqşam 2012 senesi içtimaiy ağda paylaşqanları içün memuriy apis cezasını alğan «Qırım birdemliginiñ» cemaat imayecisi ve koordinatorı Mustafa Seydaliyev azatlıqqa çıqtı. Bu aqta «Qırım birdemliginiñ» faalleri Qırım.Aqiqatqa bildirdi.
İlk 14 künni Seydaliyev Kezlev izolâtorında keçirdi, daa 10 künni – Aqmescitniñ vaqtınca tutuv izolâtorında.
Dekabrniñ 17-nde Rusiye kontrolindeki Qırım Yuqarı mahkemesi Seydaliyevniñ 2012 senesi içtimaiy ağlarda paylaşqanları içün memuriy apis cezasını qanunğa uyğun dep tanıdı.
Rusiye kontrolindeki Qırımnıñ İslâm Terek rayon mahkemesiniñ qararlarınen Seydaliyev Rusiye Memuriy uquq bozuvları kodeksiniñ 20.29 maddesine istinaden (Ekstremist malümatnı azırlav ve tarqatuv) qabaatlı tanıldı, oña er bir protokol içün 10 kün memuriy apis cezası berildi.
Seydaliyev 2012 senesi «VKontakte» içtimaiy ağında Rusiye ekstremist malümatlar cedvelinde olğan videonı derc etkeninde qabaatlandı.
«Qırım birdemliginiñ» koordinatorı dekabrniñ 7-nde birinci memuriy apis cezası bitken soñ azat etilmedi.
