Ukraina jurnalistleri milliy birligi «Qırım birdemligi» cemaat birleşmesine em kütleviy haber vastalarınıñ vekillerinden, em jurnalistika fakültetiniñ studentleri ve ocalarından Qırımda taqip etilgen cemaat jurnalistlerine qoltutuv 370 muracaat ve tileklerni berdi. Bu aqta teşkilât bildirdi.
«Siz küçlü insanlarsıñız, taqip, qabaatlav, apis cezalarına baqmadan, buña qarşı tura bilesiñiz. Jurnalistler – bir-birine daima qoltutacaq büyük bir qoranta. Sizge işanamız!», – dep aytıla «Qırım birdemligi» alğan vesiqada.
Ukraina jurnalistleri milliy birliginiñ yolbaşçısı Sergey Tomilenko qayd etkenine köre, bugünki künde Qırımda Rusiye akimiyeti tarafından taqip etilgen jurnalistlerge olğan birdemlikni ileriletmek kerek.
«Zenaatdaşlarımıznı siyasiy mabüs dep sayamız. Olar cemaat menfaatları içün çalışqanları sebebinden apiste tutula», – dep yazdı o, facebookta.
«Qırım birdemligi», bu yıl devamında yarımadada eñ az 17 kere mühbirler tutuldı ve faaliyetlerine keder etildi, dep qayd etti.
Teşkilâtnıñ doquz jurnalisti SİZOda ve koloniyalarda tutula.
«Qırım FSBsi olarnı terror faaliyetinde qabaatladı, faaller qabaatlarını tanımay ve olarğa qarşı cinaiy davalarnı sahte dep adlandıra», – dep aytıla haberde.
Ukraina jurnalistleri milliy birligi Rusiye FSBsi tarafından tutulğan ve işğal etilgen Qırımda apiske alınğan Azatlıq Radiosınıñ (Qırım.Aqiqat leyhası) ştattan tış hadimi Vladislav Yesipenkonı acele azat etmege çağırdı.
Dekabrniñ 3-nde Kyivde Rusiye işğal etken Qırımdaki jurnalistlernen online birdemlik körüşüvi olıp keçti.
