Rusiye kontrolindeki Aqmescitniñ Merkeziy rayon mahkemesi «Qırım birdemligi» cemaat birleşmesiniñ koordinatorı Mustafa Seydaliyevni karantin talaplarına riayet etmegeninde qabaatlap, 10 biñ ruble para cezasını berdi.
Seydaliyev Qırım garnizon arbiy mahkemesiniñ binası ögünde diñleyici olaraq bulunğanda tutuldı. Anda ükümge qarşı istinaf baqılğan «Qarasuvbazardaki Hizb ut-Tahrir gruppasınıñ» davası boyunca açıq oturışuv keçirildi.
«Binağa erkek kirip olamadı ve qararnı tışta bekledi, naqliyatnıñ, vatandaşlarnıñ keçmesine keder etmedi, mesafe qorup, maska taqqan edi. Buña baqmadan, Rusiye gvardiyası onı ve daa 20 insannı tuttı, olarnı avtozakqa mindirip, Aqmescitniñ №3 polis bölügine yolladı, anda Rusiye Federatsiyasınıñ Memuriy uquq bozuluvları kodeksiniñ 20.6.1 maddesine istinaden memuriy protokollar tizildi», – dep aytıla «Qırım birdemliginiñ» haberinde.
Seydaliyev, ne öz qabaatını, ne de diger tutulğanlarnıñ qabaatlı olğanını qabul etmey. O, olar Rusiye qanunlarını bozmadı, dep qayd etti.
«Olar qırımtatarlar semetdeşleriniñ mahkeme oturışuvlarına kelmesin ve nefishor olsun istey, bu diniy ve ahlâqiy temellerimizge zıt kele. Biz bu mahkemelerge kelmege devam etecekmiz», – dep qayd etti Seydaliyev.
Noyabrniñ 1-nde quvetçiler Qurmandaki «Hizb ut-Tahrir davasınıñ» istinafı baqılğan Qırım garnizon arbiy mahkemesiniñ oturışuvına diñleyici olaraq kelgen 21 qırımtatarını tuttı. Böyle tedbirler oktâbrniñ 11-nde ve 25-nde ötkerilgen edi. Uquq qoruyıcı organlar o vaqıt da qırımtatarlarnı kütleviy şekilde tuttı. Soñra olarğa para cezası berildi.
