«Qırım birdemligi» mühbiri Ali Seitablayev İç işler nazirligi bölüginden yiberildi, oña arbiy cedvelge aluv vesiqalarını bilmek ve psihologik testten keçmesi içün arbiy komissarlıqqa celpname bergenler», – dep bildirdi «Qırım birdemligi».
Rusiye uquq qoruyıcıları mahkeme binası ögünde diñleyicilerni dağıtqanda Seitablayevni tuttı.
Fevralniñ 29-nda saba Eski Qırımda ve Seyit Eli (Juravki) köyünde Rusiye uquq qoruyıcıları dört qırımtatarı Lenur Yakubov, İzet Sayfullin, İdris Yurdamov ve Şevket Kiyamovnıñ evlerinde tintüv keçirdi. Eski Qırım camisi de tintildi.
Tintüvlerden soñ Eski Qırımlı faal ve iş adamı Lenur Yakubov ve «Eski Qırım» mustaqil musulman cemiyetiniñ imamı İzet Sayfullin tutuldı. İdris Yurdamov ve Şevket Kiyamovnı uquq qoruyıcılar evlerinde qaldırdı. Olarğa qarşı memuriy protokollar tizilmedi.
Daa soñra Sayfullin polis bölüginden yiberildi. Oña qarşı «qanunsız missionerlik faaliyeti» içün memuriy protokol tizildi. Belli olğanına köre, Lenur Yakubovğa qarşı da memuriy protokol tizildi, onı 14 künge apiske alğanlar.
Polis bölüginden çıqqan Sayfullin «halq imamı», yani Eski Qırım camilerinden birinde halq saylağan imam ola, dep ayttı. Rusiye uquq qoruyıcılarınıñ malümatın köre, Sayfullinden yanvarniñ 19-nda Cuma namazını qıldırğanı içün şikâyet etildi. «Qanunsız missionerlik faaliyetini kerçekleştirgen» eken, çünki caminiñ vesiqaları bar, anda cami imamı olaraq başqa adam qayd etilgen.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
