İyünniñ 28-nde faaller Qırım yarımadasına Ukrainanıñ farqlı şeerlerinde yaşağanlar imzalağan qırımtatar bayrağını ve 9 000 varaqanı uçurdı. Bayraq memuriy sıñırdan Ermeni Bazar tarafına uçıp ketti, dep haber ete Qırım.Aqiqat mühbiri.
Aktsiya bu raatlıq künleri, iyünniñ 26-nda qayd etilgen Qırımtatar bayraq kününe ve Qırımtatar Milliy Qurultayı faaliyeti yañıdan başlağanınıñ 30 yılına bağışlandı.
Birinci tilekni bayraqta qırımtatarlarnıñ milliy lideri Mustafa Cemilev yazdı, soñra Kyiv, Lviv, Dnipro ve Vinnıtsâ sakinleri qırımlılar içün tileklerini qaldırdı.
16-ğa 9 metrlik qırımtatar bayrağını Donetsk vilâyetindeki Kramatorskta göñülliler tikti.
Aktsiya teşkilâtçıları bayraq işğal etilgen Qırımğa «qırımlılar unutılmağanını» köstermek içün uçurıldı.
Qırımtatar bayraq künü
Er yıl iyünniñ 26-nda qırımtatarlar Milliy bayraq kününi qayd ete. Bayram künü olaraq 1991 senesi iyünniñ 26-27-nde Aqmescitte ötkerilgen ekinci Qırımtatar Milliy Qurultayınıñ birinci künü saylânğan edi.
Qırımtatar bayrağı üzerinde altın tamğa tasvir etilgen kök bayraqtır. Tantanalı tedbirler em Qırımda, em esas Ukrainada, em çetelde ötkerile.
