Rusiye kontrolindeki Qırımnıñ Canköy rayon mahkemesi Rusiye Ceza kodeksiniñ 208-inci maddesiniñ 2-nci qısmına istinaden «Noman Çelebicihan batalyonında» iştirak etkeninde qabaatlanğan Ukrayına vatandaşı 4 yıl ve 3 ayğa sert rejimli koloniyada qalmasına üküm etildi.
Rusiye Yuqarı mahkemesi bu birleşmeni terror teşkilâtı dep tanığan edi.
Qırımnıñ Rusiye ükümetine yaqın «Krıminform» saytı haber etkenine köre, bu malümatnı Qırım ve Aqyardaki Rusiye FSB idaresiniñ vekili Yelena Varlamova seslendirdi.
Rusiye tahqiqatınıñ fikirince, «mabüs 2016 senesi Ukrayınada olıp, qanunsız silâlı birleşmege qoşuldı», anda Qırım ve Herson vilâyetiniñ memuriy sıñırındaki keçiş noqtasında şahıs ve naqliyat vastalarını teşkerdi.
Berilgen malümatqa köre, Ukrayına vatandaşı Konstantin Tereşçenko Rusiye FSB idaresiniñ sıñır idaresiniñ hadimleri tarafından 2022 senesi iyün ayında tutuldı, oña qarşı Rusiye Ceza kodeksiniñ 208 maddesiniñ 2-nci qısmına istinaden cinaiy dava açıldı.
Mabüs ya da advokatlarınıñ izaatları daa yoq.
Ukraina uquq qoruyıcı organları erkânında qırımtatar batalyonını quruv munaqaşası 2016 senesinden berli devam ete.
Ukraina İç işler nazirligine ait Ukraina Milliy gvardiyası, olarnıñ qurulışında «qırımtatar batalyonınıñ» qurulması aqqında beyanatlar şimdilik qanun seviyesinde tasdıqlanmağan beyanatlar olıp qla, dep qayd etken edi.
«Asker» cemaat teşkilâtınıñ yolbaşçısı Lenur İslâmov Noman Çelebicihan «qırımtatar batalyonına» arbiy bölük nomerasını bermege talap etken edi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
