Rusiye akimiyeti gece Rusiye işğal etken Aqyarda bir qaç kere ava telükesini ilân etti, şeerde patlavlar eşitildi. Yerli sakinler ve saifeler Qırımnıñ farqlı regionlarında atış ve patlav sesleri aqqında haber etti.
Rusiye işğal etken Aqyarnıñ Rusiye yolbaşçısı Mihail Razvojayev iyünniñ 2-nde gece ve saba bir qaç kere ava telükesini ilân etti, saat 06:52-de o bitti, monitoring kanalları Qırımda atış ve patlav sesleri aqqında haber etti.
"Aqyarda arbiyler Ukrayina Silâlı quvetleriniñ ücümini keri qaytara, ava mudavaası ve mobil ateş gruppaları çalışa. Balıqlava rayonında 2 uçucısız urıp tüşürildi", – dep yazdı Razvojayev Telegram kanalında.
"Krımskiy veter" telegram kanalı abunecileriniñ malümatına esaslanıp, "Kefe, İslâm Terek rayonı, Felenk burnu ve Aqyarda patlavlar. Saat 01:40-ta Aqyar civarındaki Baydar uvasında patlavlar eşitildi. Canköyde mobil ateş gruppaları evler üstünde dronlarnı urıp tüşürmege tırışa", dep yazdı.
Bu "telegram kanalı" abunecileriniñ malümatına esaslanıp, saba patlavlar Aqyarda "Kaça" ve "Belbek" uçaq alanları ve Aqmescit civarında "Gvardeyskoye" uçaq alanında patlavlar eşitildi.
Yerli saifeler Canköy rayonında patlavlar aqqında bildirdi, Canköy vokzalında "sapörlar çalışa", dep haber etildi.
Qırım.Aqiqatnıñ Aqyar mühbiri haber etkenine köre, qara ve deñiz naqliyatı şeerde ve Aqyar körfezinde areketini toqtattı.
Rusiye Mudafaa nazirligi saba bildirgenine köre, "keçken gece iyünniñ 1-nde saat 20.00-den başlap iyünniñ 2-nde saat 7.00-ge qadar ava mudafaasınıñ nevbetçi vastaları Qırım yarımadası ve Azaq ve Qara deñizlerinde 148 ukrayin uçucısızını tuttı".
Haber derc etilgende Ukrayina haberleri Rusiye arbiyleriniñ Qırım obyektlerine qarşı darbe aqqında bildirmegen edi.
Yañı malümat: Saat 08:30-da yerli pablikler Qırımda "uçucısız telükesi" aqqında bildirdi, saat 9:44-te lâğu etildi.
2022 senesinden başlap Qırım yarımadasınıñ territoriyasına aman-aman er kün pilotsız uçaq ve raketalar ücüm ete. Çoqusı allarda Rusiye Mudafaa nazirligi ya da Rusiye akimiyeti, bu malümatnı tasdıqlasa bile, arbiy obyektlerge zarar ketirilgenini tasdıqlamay.