İyünniñ 5-nde gece Qırımnıñ çeşit regionlarında ve Aqyarda patlavlar eşitildi. Rusiye akimiyeti gece Aqyarda bir qaç kere ava telükesini ilân etti. Yerli telegram kanalları işğal etilgen Qırım ve Aqyarda ava telükesi aqqında haber etti.
"Krımskiy veter" Telegram kanalı abunecileriniñ malümatına esaslanıp haber etkenine köre, patlavlar Keriçte, Felenk burnunda, Aqyarda Kazaçya körfezinde eşitildi.
"Saat 01.00-de Keriçte eki küçlü patlav eşitildi. Tahminen 02.20-de Aqyarda Gen.Ostrâkov caddesinde uçucısız eşitildi, atışlar oldı ve küçlü patlav eşitildi. Bundan soñ ava telükesi çalıştırıldı. 02.44-te Felenk burnunda pek küçlü patlav oldı, uzun, evler teprendi. 06.54-te "Kaça" uçaq alanı civarında eki küçlü patlav oldı", – dep yazdı Telegram kanalı abunecilerine esaslanıp.
8:03-te Rusiye pablikleri Qırımda ava telükesi ve "uçucısız telükesi" aqqında yazdı. Aqyarnıñ Rusiye yolbaşçısı Mihail Razvojayev saat 8:12-de kene şeerde ava telükesi aqqında bildirdi.
Yañı malümat: Saat 08:41-de Aqyarnıñ Rusiye yolbaşçısı ava telükesi yekünlendi, dep haber etti.
Rusiye Mudafaa nazirligi saba bildirgenine köre, "iyünniñ 4-nde saat 20.00-den başlap iyünniñ 5-nde saat 7.00-ge qadar ava mudafaasınıñ nevbetçi vastaları Qırım yarımadası ve Azaq ve Qara deñizlerinde 123 ukrayn uçucısızını tutıp yoq etti".
Ukrayina ve Rusiye arbiyleri bu malümatnı izaatlamadılar.
Qırım.Aqiqat muarririyeti cenk vaziyetinde bu malümatnı mustaqil şekilde teşkerip olamay.
2022 senesinden başlap Qırım yarımadasınıñ territoriyasına aman-aman er kün pilotsız uçaq ve raketalar ücüm ete. Çoqusı allarda Rusiye Mudafaa nazirligi ya da Rusiye akimiyeti, bu malümatnı tasdıqlasa bile, arbiy obyektlerge zarar ketirilgenini tasdıqlamay.